തിരൂരങ്ങാടി (മലപ്പുറം) ∙ 4 വയസ്സുകാരിയെ ലൈംഗികമായി പീഡിപ്പിച്ച സംഭവത്തിൽ അറസ്റ്റിലായ അതിഥിത്തൊഴിലാളിയെ റിമാൻഡ് ചെയ്തു. മധ്യപ്രദേശ് മൊറീന ടെൻഡ്ര ബാലാജി മന്ദിർ രാം മഹേഷ് കുശ്വയെ (36) ആണ് പൊലീസ് അറസ്റ്റ് ചെയ്തത്. ഇയാൾക്ക് ക്രിമിനൽ പശ്ചാത്തലം ഉണ്ടോ എന്ന് അന്വേഷിക്കുമെന്ന് എസ്എച്ച്ഒ കെ.ടി.ശ്രീനിവാസൻ പറഞ്ഞു.വ്യാഴം ഉച്ചയ്ക്കാണു സംഭവം. മധ്യപ്രദേശ് സ്വദേശികളുടെ മകളെയാണ് ഇയാൾ പീഡിപ്പിച്ചത്. കുട്ടിയുടെ രക്ഷിതാക്കളുടെ സുഹൃത്താണ് പ്രതി.
ഉച്ചയ്ക്ക് 2ന് ശേഷം ഇവരുടെ താമസ സ്ഥലത്തെത്തിയ പ്രതി കളിപ്പിക്കാനെന്ന് പറഞ്ഞു താമസ സ്ഥലത്തേക്ക് കൊണ്ടുപോകുകയായിരുന്നു. കുട്ടിയുടെ പിതാവ് ജോലിക്ക് പോയതായിരുന്നു. പിന്നീട് കുട്ടി കരഞ്ഞുകൊണ്ടു വരുന്നതുകണ്ടു വിവരമന്വേഷിച്ചപ്പോഴാണ് പീഡിപ്പിച്ച വിവരം പറഞ്ഞത്. കുട്ടിയുടെ മാതാവ് പൊലീസിൽ വിവരമറിയിച്ചു. തേഞ്ഞിപ്പലം പൊലീസെത്തിയാണ് പ്രതിയെ കസ്റ്റഡിയിലെടുത്ത് തിരൂരങ്ങാടി പൊലീസിന് കൈമാറിയത്. വൈദ്യപരിശോധനയിൽ പീഡനം തെളിഞ്ഞു. ഇതോടെ ഇന്നലെ രാവിലെ പ്രതിയുടെ അറസ്റ്റ് രേഖപ്പെടുത്തി. പ്രതി ഒരു വർഷം മുൻപാണ് ഇവിടെയെത്തിയത്. മാർബിൾ ജോലിക്കാരനാണ്.
