കൊല്ക്കത്ത : മുപ്പത്തിയഞ്ചാം പിറന്നാള് ദിനത്തില് ഏകദിന സെഞ്ചുറികളില് ഇതിഹാസതാരം സച്ചിന് ടെന്ഡുല്ക്കറുടെ റെക്കോര്ഡിനൊപ്പമെത്തി വിരാട് കോലി. ലോകകപ്പില് കൊല്ക്കത്ത ഈഡന് ഗാര്ഡന്സില് ദക്ഷിണാഫ്രിക്കക്കെതിരെ 49-ാം ഏകദിന സെഞ്ചുറി നേടിയാണ് കോലി സച്ചിന്റെ റെക്കോര്ഡിനൊപ്പമെത്തിയത്. പിറന്നാള് ദിനത്തില് ആദ്യമായി കളിക്കാനിറങ്ങിയ കോലി കാഗിസോ റബാഡ എറിഞ്ഞ 49-ാം ഓവറിലാണ് സെഞ്ചുറിയുമായി സച്ചിനൊപ്പമെത്തിയത്. 119 പന്തില് 10 ബൗണ്ടറികള് പറത്തിയാണ് കോലി സെഞ്ചുറിയടിച്ചത്.
ഈ ലോകകപ്പില് രണ്ട് തവണ സെഞ്ചുറിക്ക് അരികെ പുറത്തായ കോലി പക്ഷെ ദക്ഷിണാഫ്രിക്കക്കെതിരെ പിഴച്ചില്ല. സ്പിന്നര്മാരെ തുണക്കുന്ന പിച്ചില് ശ്രേയസ് അയ്യര്ക്കൊപ്പം ക്ഷമയോടെ ബാറ്റ് ചെയ്ത കോലി ഇന്ത്യക്ക് കൂറ്റന് സ്കോര് ഉറപ്പാക്കിയതിനൊപ്പം റെക്കോര്ഡിനൊപ്പമെത്തുകയും ചെയ്തു. അര്ധസെഞ്ചുറി പിന്നിട്ടപ്പോള് ഏകദിന ക്രിക്കറ്റില് ഏറ്റവും കൂടുതല് തവണ അര്ധസെഞ്ചുറി നേടുന്ന രണ്ടാമത്തെ താരമെന്ന റെക്കോര്ഡ് കോലി സ്വന്തമാക്കിയിരുന്നു.
