ഹരിയാന : ഹരിയാനയിലെ ഗുരുഗ്രാമില്‍ ശിശുക്കളെ കടത്തുന്ന അന്തര്‍സംസ്ഥാന സംഘത്തെ അറസ്റ്റ് ചെയ്തതായി പോലീസ്. രണ്ട് സ്ത്രീകളുള്‍പ്പെടെ മൂന്ന് പേരാണ് കസ്റ്റഡിയിലുള്ളത്. കൈക്കുഞ്ഞുങ്ങളെ കടത്താന്‍ ശ്രമിക്കുന്നതിനിടെയാണ് ഇവര്‍ പിടിയിലായത്. ”പ്രതികള്‍ രണ്ട് കൈക്കുഞ്ഞുങ്ങളെ കടത്താന്‍ പദ്ധതി തയ്യാറാക്കിയിരുന്നു. കുട്ടികളെ കടത്താന്‍ ടാക്‌സിയും വിളിച്ചു. യാത്രയ്ക്കിടെ സ്ത്രീകള്‍ക്ക് നിരവധി ഫോണ്‍ കോള്‍ വരുന്നുണ്ടായിരുന്നു. ഇവരുടെ സംസാരത്തില്‍ സംശയം തോന്നിയ ടാക്‌സി ഡ്രൈവര്‍ നേരെ പോലീസ് സ്റ്റേഷനിലേക്ക് കൊണ്ടുവന്നു,” പോലീസ് ഉദ്യോഗസ്ഥന്‍ പറഞ്ഞു. അന്വേഷണത്തില്‍ ശിശുക്കളെ ഡല്‍ഹിയില്‍ നിന്ന് രാജസ്ഥാനിലേക്ക് കടത്തി മൂന്ന് ലക്ഷം രൂപയ്ക്ക് വില്‍പന നടത്തുന്ന സംഘമാണെന്ന് കണ്ടെത്തി. തുടര്‍ന്ന് ഇവര്‍ക്കെതിരെ കേസ് രജിസ്റ്റര്‍ ചെയ്ത് കൂടുതല്‍ അന്വേഷണം ആരംഭിച്ചു.
