തിരുവനന്തപുരം: ആരോഗ്യവകുപ്പ് ഡയറക്ടറുടെ ചുമതലയുള്ള ഉദ്യോഗസ്ഥ സർവീസിൽനിന്ന് സ്വയം വിരമിക്കുന്നു. മൂന്നര വർഷത്തെ സേവനം ബാക്കിനിൽക്കെയാണ് ഡിഎച്ച്എസ് ഡോ.പ്രീത സ്വയം വിരമിക്കലിനു അപേക്ഷ നൽകിയത്. വ്യക്തിപരമായ കാരണങ്ങളാലാണ് തീരുമാനം. വിരമിക്കലിനു സർക്കാർ തത്വത്തിൽ അനുമതി നൽകി. ഈ മാസത്തോടെ ഡോ.പ്രീത സേവനം അവസാനിപ്പിക്കും.
പിണറായി സർക്കാർ അധികാരത്തിൽ വന്നശേഷം രണ്ടാമത്തെ ആരോഗ്യവകുപ്പ് ഡയറക്ടറാണ് സർവീസിൽനിന്ന് സ്വയം വിരമിക്കുന്നത്. വ്യക്തിപരമായ കാരണമാണ് ഡയറക്ടർമാരുടെ വിരമിക്കലിനു പിന്നിലെന്നു പറയുന്നുണ്ടെങ്കിലും രാഷ്ട്രീയ ഇടപെടലുകളാണ് കാരണമെന്നു ജീവനക്കാരിൽ ഒരു വിഭാഗം പറയുന്നു. ധനകാര്യവിഭാഗം ഗുരുതര വീഴ്ച കണ്ടെത്തിയതിനെ തുടർന്ന് അച്ചടക്ക നടപടി നേരിട്ടയാളെ പുതിയ ഡയറക്ടറായി നിയമിക്കാനുള്ള നീക്കങ്ങൾ ആരംഭിച്ചിട്ടുണ്ട്. അച്ചടക്ക നടപടി നേരിടുന്നതിനാൽ ഇയാളെ ഡിഎച്ച്എസ് തസ്തികയിലേക്കു പരിഗണിക്കാൻ കഴിഞ്ഞിരുന്നില്ല. ഗുരുതര പരാമർശങ്ങൾ നിലനിൽക്കേ തന്നെ ഈ മാസം അഞ്ചിന് അച്ചടക്ക നടപടി വകുപ്പ് അവസാനിപ്പിച്ചു. ഈ ഉദ്യോഗസ്ഥനുവേണ്ടിയാണ് ഡിഎച്ച്എസ് നിയമനം വൈകിപ്പിക്കുന്നതെന്ന് ജീവനക്കാർ ആരോപിക്കുന്നു.
ആരോഗ്യവകുപ്പിന്റെ ചരിത്രത്തിൽ ആദ്യമായാണ് ഡിഎച്ച്എസ് തസ്തിക ഇത്രയുംകാലം ഒഴിഞ്ഞു കിടക്കുന്നത്. ഡോ.സരിത വിരമിച്ചപ്പോൾ ഡോ.രമേശിനെ ഡയറക്ടറായി നിയമിച്ചു. എന്നാൽ, രണ്ടു മാസത്തിനുശേഷം അദ്ദേഹം ചുമതലയിൽനിന്ന് ഒഴിഞ്ഞപ്പോൾ അഡീ.ഡയറക്ടർ ഡോ.രാജുവിനു താൽക്കാലിക ചുമതല നൽകി. ഏതാനും മാസങ്ങൾക്കുശേഷം അദ്ദേഹം വിരമിച്ചപ്പോൾ അഡീ.ഡയറക്ടറായ ഡോ.പ്രീതയ്ക്കു താൽക്കാലിക ചുമതല നൽകി. ദീർഘനാളായി ഒഴിഞ്ഞു കിടന്നിരുന്ന അഡീ.ഡയറക്ടർമാരുടെ പോസ്റ്റുകൾ ജൂലൈയിൽ വകുപ്പുതല പ്രമോഷൻ കമ്മിറ്റി ചേർന്ന് നികത്തിയിരുന്നു. ആ സമയത്തും ഡിഎച്ച്എസിനെ നിയമിച്ചിരുന്നില്ല. 2021 ഓഗസ്റ്റ് മാസത്തിൽ അഡീ.ഡയറക്ടറായിരുന്ന രമേശ് വിരമിച്ചപ്പോഴുള്ള തസ്തിക ഇതുവരെയും നികത്തിയിട്ടില്ല.
