കോഴിക്കോട്∙ ഇന്ന് ചേരുന്ന കോർപറേഷൻ കൗൺസിൽ യോഗത്തിന്റെ അജൻഡയിൽ ഉൾപ്പെടുത്തിയ ഏക വ്യക്തിനിയമത്തിനെതിരായ പ്രമേയം പിൻവലിക്കാൻ ഹൈക്കോടതിയുടെ ഇടക്കാല ഉത്തരവ്. തങ്ങളുടെ അധികാര പരിധിക്കുപുറത്ത് ദേശീയ, രാജ്യാന്തര പ്രശ്നങ്ങളിൽ പതിവായി പ്രമേയം അവതരിപ്പിക്കാറുള്ള കോർപറേഷന്റെ നീക്കം ആവർത്തിക്കുന്നതിനെതിരെയാണ് ബിജെപി കോടതിയെ സമീപിച്ചത്. മുൻപ് കശ്മീർ വിഷയത്തിലടക്കം കോർപറേഷൻ പ്രമേയം പാസാക്കിയിരുന്നു.
ഇന്നു ചേരുന്ന കൗൺസിൽ യോഗത്തിൽ 137ാം അജൻഡയായാണ് ഏക വ്യക്തിനിയമത്തിനെതിരെ പ്രമേയം ഉൾപ്പെടുത്തിയത്. പ്രമേയം കോർപറേഷൻറെ പുറത്തുളള കാര്യമാണെന്നും നഗരപാലികാ നിയമങ്ങളുടേയും ചട്ടങ്ങളുടേയും ലംഘനമാണെന്നും ബിജെപി ആരോപിച്ചിരുന്നു. പ്രമേയം അവതരിപ്പിക്കരുതെന്ന് ബിജെപി കൗൺസിലർ നവ്യഹരിദാസ് മേയർക്കും സെക്രട്ടറിക്കും 19ന് നോട്ടിസ് നൽകിയിരുന്നു. എന്നാൽ ഇവർ അവതരണാനുമതി നിഷേധിച്ചില്ല. തുടർന്നാണ് ബിജെപി ഹൈക്കോടതിയെ സമീപിച്ചത്.
പ്രമേയം കോർപറേഷൻ പരിധിക്കുപുറത്തുള്ള കാര്യമാണ്. കോർപറേഷന്റെ കൗൺസിലിലെ പ്രമേയങ്ങളിൽ കോർപറേഷന്റെ അധികാര പരിധിക്കുപുറത്തുള്ള വിഷയങ്ങൾ അനുവദിക്കരുതെന്ന് മുനിസിപ്പാലിറ്റി നിയമത്തിലെ പതിനെട്ടാം വകുപ്പിൽ പറയുന്നുണ്ട്. കേന്ദ്രസർക്കാരിന്റെ നിയമങ്ങൾക്കെതിരെ പ്രമേയങ്ങൾ പാസാക്കാൻ ഭരണഘടനാപ്രകാരം കോർപറഷേൻ കൗൺസിൽയോഗത്തിന് അധികാരമില്ലെന്നും ബിജെപിയുടെ ഹർജിയിൽ ചൂണ്ടിക്കാണിച്ചിട്ടുണ്ട്.. ഭരണഘടനയുടെ പരിധിയിൽപെടുന്ന വിഷയങ്ങളിൽ കോർപറേഷൻ എതിർപ്രമേയങ്ങൾ കൊണ്ടുവന്നാൽ കടുത്ത നടപടികളെടുക്കാനും വകുപ്പുകളുണ്ടെന്നും ഹർജിയിൽ പറയുന്നു.
കേന്ദ്രസർക്കാരിനെതിരെ രാഷ്ട്രീയ വൈരാഗ്യം തീർക്കാൻ ഇല്ലാത്ത അധികാരങ്ങൾ പ്രയോഗിച്ച് ഭരണഘടനാ വിരുദ്ധ നീക്കങ്ങൾ നടത്തുന്നവർക്കെതിരെയുളള താക്കീതാണ് ഹൈക്കോടതി ഉത്തരവെന്ന് ബിജെപി ജില്ലാപ്രസിഡന്റ് വി.കെ.സജീവൻ പറഞ്ഞു. നിരന്തരമായി ഒരു ചടങ്ങുപോലെ ചട്ടങ്ങൾക്കു വിരുദ്ധമായി കൗൺസിൽ യോഗ അജണ്ടകളിൽ കേന്ദ്രസർക്കാരിനെതിരായും ഭരണഘടനക്കെതിരെയും പ്രമേയങ്ങൾ അവതരിപ്പിക്കുന്നത് നിയമ വിരുദ്ധ നീക്കങ്ങളാണ്. ഭരണഘടനയിൽ ഊന്നിപ്പറയുന്ന വിഷയത്തിനെതിരായി ഒരു നഗരസഭ ഔപചാരികമായി പ്രമേയം പാസ്സാക്കുന്നത് നിയമവിരുദ്ധമാണെന്ന് എല്ലാവർക്കും അറിയാവുന്നതാണ്. ഇതിനുമുൻപ് കേന്ദ്രസർക്കാർ പാസ്സാക്കിയ നീതി ആയോഗിനെതിരെയുളള പ്രമേയവും കോടതി ഇടപെട്ട് തടഞ്ഞിരുന്നു. ആക്ഷേപമുന്നയിച്ച് നോട്ടിസ് നൽകിയിട്ടും മേയറോ, സെക്രട്ടറിയോ അവതരണാനുമതി നിഷേധിക്കാതിരുന്ന സാഹചര്യത്തിലാണ് ഹൈക്കോടതിയെ സമീപിക്കാൻ ബിജെപി തീരുമാനിച്ചതെന്നും സജീവൻ പറഞ്ഞു. നിയമവിരുദ്ധവും ഭരണഘടനാവിരുദ്ധവുമായ പ്രമേയങ്ങൾ കൗൺസിൽ യോഗത്തിന്റെ ഔപചാരികമായ അജൻഡയിൽ ഉൾപ്പെടുത്തിയവർക്കെതിരെ പൊലീസ് കേസെടുക്കണമെന്നും വി.കെ.സജീവൻ പറഞ്ഞു.
