രാജകുമാരി: ജില്ലയിലെ ബവ്റിജസ് ഔട്‌ലെറ്റുകളിൽ ക്യൂ നിൽക്കാതെ ഇഷ്ടമുള്ള മദ്യം തിരഞ്ഞെടുത്ത് ബില്ലടയ്ക്കാൻ ഉപഭോക്താവിന് അവസരമൊരുങ്ങുന്നു. ബവ്റിജസ് കോർപറേഷന്റെ ഔട്‌ലെറ്റുകളിലെല്ലാം ഓഗസ്റ്റ് ഒന്നിനു മുൻപായി വോക് ഇൻ സംവിധാനം നടപ്പാക്കണമെന്നാണ് എംഡിയുടെ നിർദേശം. ജില്ലയിൽ കട്ടപ്പന, തൊടുപുഴ എന്നിവിടങ്ങളിലെ ഔട്‌ലെറ്റുകളിൽ മാത്രമാണ് നിലവിൽ ഇൗ സംവിധാനമുള്ളത്. അടിമാലിയിലുള്ള കൺസ്യൂമർ ഫെഡ് ബവ്റിജസ് ഔട്‌ലെറ്റിലും ക്യൂ നിൽക്കാതെ മദ്യം വാങ്ങാം.
ഹൈക്കോടതി നിർദേശത്തെത്തുടർന്നാണ് എല്ലാ ബവ്റിജസ് ഷോപ്പുകളും വോക് ഇൻ സംവിധാനത്തിലേക്ക് മാറുന്നത്. ബവ്റിജസ് ഔട്‌ലെറ്റുകളിലെ ക്യൂ പൊതുജനങ്ങൾക്ക് ബുദ്ധിമുട്ടുണ്ടാക്കുന്നുവെന്ന ഹർജിയിലാണ് ഹൈക്കോടതി ഇടപെടലുണ്ടായത്. 3 പ്രീമിയം ഔട്‌ലെറ്റുകൾ ഉൾപ്പെടെ ജില്ലയിലുള്ള17 ബവ്റിജസ് ഷോപ്പുകളിൽ ഭൂരിഭാഗത്തിലും വോക് ഇൻ സംവിധാനം തുടങ്ങാൻ സൗകര്യക്കുറവുണ്ടെന്ന് അധികൃതർ പറയുന്നു.
2,000 ചതുരശ്ര അടിക്ക് മുകളിൽ വിസ്തീർണമുള്ള ഔട്‌ലെറ്റുകളിലാണ് സംവിധാനം ഏർപ്പെടുത്താൻ കഴിയുക. എന്നാൽ, മൂന്നാർ ഉൾപ്പെടെ ആറിലധികം ഔട്‌ലെറ്റുകളിൽ ആവശ്യത്തിനു സ്ഥലസൗകര്യമില്ലെന്ന് ബവ്കോ അധികൃതർ റിപ്പോർട്ട് നൽകിയിട്ടുണ്ട്. ഇവയിൽ ചിലത് മാറ്റി സ്ഥാപിക്കണമെന്ന് നേരത്തേ തന്നെ എംഡിയുടെ നിർദേശമുണ്ടെങ്കിലും പകരം സ്ഥലം കണ്ടെത്തുന്നതിലെ പ്രായോഗിക ബുദ്ധിമുട്ട് അധികൃതർ മേലുദ്യോഗസ്ഥരെ അറിയിക്കുകയായിരുന്നു.
സ്ഥല സൗകര്യം കൂടുതലുള്ള പുതിയ കെട്ടിടത്തിലേക്കു മാറ്റി സ്ഥാപിച്ച രാജകുമാരിയിലെ ബവ്റിജസ് ഔട്‌ലെറ്റിലായിരിക്കും ആദ്യമായി വോക് ഇൻ സംവിധാനം നടപ്പാക്കുക. ഇതിനുള്ള ക്വട്ടേഷൻ ഹെഡ് ഓഫിസിനു കൈമാറിയതായി അധികൃതർ വ്യക്തമാക്കി. ജില്ലയിൽ പുതുതായി അനുവദിക്കുന്ന 8 ഔട്‌ലെറ്റുകളിലും വോക് ഇൻ സംവിധാനം ഏർപ്പെടുത്തുമെന്നാണ് വിവരം.
