തിരുവനന്തപുരം: ഡ്യൂട്ടിക്കിടയിൽ ബസ് കണ്ടക്ടറെ മർദ്ദിച്ച രണ്ടുപേരെ കാഞ്ഞിരംകുളം പൊലീസ് അറസ്റ്റ് ചെയ്തു. കരുംകുളം മേടവിളാകം വീട്ടിൽ ജോർജ് (40), മേടവിളാകം വീട്ടിൽ ക്രിസ്തുദാസ് (67), എന്നിവരാണ് അറസ്റ്റിലായത്. പൂവാർ ഡിപ്പോയിലെ കണ്ടക്ടർ സാബുവിനെയാണ് മദ്യപിച്ച് ബസിൽ യാത്ര ചെയ്യുകയായിരുന്ന ഇരുവരും ചേർന്ന് മർദ്ദിച്ചത്. ഇന്നലെ ഉച്ചയോടെ കരുംകുളം കണ്ണാടി പള്ളിക്ക് സമീപത്താണ് സംഭവം. തിരുവനന്തപുരത്തേയ്ക്ക് പോവുകയായിരുന്നു ബസിൽ പൂവാറിൽ നിന്നും കയറിയ രണ്ടുപേരും ടിക്കറ്റ് എടുക്കാൻ ആവശ്യപ്പെട്ടതിനെ തുടർന്ന് കണ്ടക്ടറിനോട് തട്ടി കയറി അസഭ്യം പറയുകയും മർദ്ദിക്കുകയായിരുന്നു. വിവരമറിഞ്ഞ് സ്ഥലത്തെത്തിയ കാഞ്ഞിരംകുളം പൊലീസ് രണ്ടുപേരെയും കസ്റ്റഡിയിലെടുത്തു. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.
