വേൾഡ് എയർ ക്വാളിറ്റി ഇൻഡക്‌സ് പുറത്തുവിട്ട കണക്കുകൾ പ്രകാരം, ഏഷ്യയിലെ ഏറ്റവും മോശം വായു ഗുണനിലവാരമുള്ള പ്രദേശങ്ങളുടെ പട്ടികയിൽ എട്ട് ഇന്ത്യൻ നഗരങ്ങള്‍ ഇടം പിടിച്ചു. എന്നാല്‍, പട്ടികയിലെ ആദ്യ പത്തില്‍ നിന്ന് ദില്ലി പുറത്ത് പോയി. വായു നിലവാരം മികച്ച 10 നഗരങ്ങളുടെ പട്ടികയില്‍ ഏക ഇന്ത്യന്‍ നഗരമായി ആന്ധ്രാപ്രദേശിലെ രാജമഹോന്ദ്രവാരം മാറി. ഏറ്റവും വായു മലിനമായ നഗരമായി ക്വാളിറ്റി ഇൻഡക്‌സ് (എക്യുഐ) 679-ൽ പോയന്‍റ് നേടി ഗുരുഗ്രാം പട്ടികയിൽ ഒന്നാം സ്ഥാനത്തെത്തി. രേവാരിക്ക് സമീപമുള്ള ധരുഹേര നഗരം (543), ബിഹാറിലെ മുസാഫർപൂർ (316) മോശം വായു നിലവാരം പുലര്‍ത്തുന്ന നഗരങ്ങളായി രണ്ടും മൂന്നും സ്ഥാനങ്ങള്‍ നേടി.
പൂജ്യത്തിനും 50-നും ഇടയിലുള്ള എ.ക്യു.ഐ നല്ലതും 51-ഉം 100-ഉം തൃപ്തികരവും 101-ഉം 200-ഉം മിതമായതും 201-ഉം 300-ഉം മോശം, 301-ഉം 400-ഉം വളരെ മോശം, 401-ഉം 500-ഉം കഠിനവും എന്നിങ്ങനെയാണ് വായു ഗുണനിലവാരം കണക്കാക്കുന്നത്. ടാൽക്കറ്റർ, ലഖ്‌നൗ (എക്യുഐ 298), ഡിആർസിസി ആനന്ദ്പൂർ, ബെഗുസാരായി (269), ഭോപ്പാൽ ചൗരാഹ, ദേവാസ് (266), ഖഡക്പഡ, കല്യാൺ (256), ദർശൻ നഗർ, ഛപ്ര ( 239) എന്നിവയാണ് പട്ടികയിൽ ഇടംപിടിച്ച മറ്റ് ഇന്ത്യൻ നഗരങ്ങൾ. ഇന്ത്യൻ നഗരങ്ങൾക്ക് പുറമെ, ലുഷൗവിലെ ചൈനയുടെ സിയാവോഷിഷാങ് തുറമുഖവും (എക്യുഐ 262) മംഗോളിയയിലെ ഉലാൻബാറ്റയിലെ ബയാൻഖോഷും മോശം വായു നിലവാരമുള്ള നഗരങ്ങളുടെ ആദ്യ പത്തില്‍ ഇടം പിടിച്ചു.
2007-ൽ ആരംഭിച്ച വേൾഡ് എയർ ക്വാളിറ്റി ഇൻഡക്‌സ്, പൗരന്മാർക്ക് വായു മലിനീകരണത്തെക്കുറിച്ചുള്ള അവബോധം പ്രോത്സാഹിപ്പിക്കുന്നതിനും ഏകീകൃതവും ലോകമെമ്പാടുമുള്ളതുമായ വായു ഗുണനിലവാര വിവരങ്ങൾ നൽകുന്നതിനുമുള്ള ഒരു പദ്ധതിയാണ്. ദീപാവലി വേളയിൽ, ഡൽഹി-എൻസിആർ ഉൾപ്പെടെ ഇന്ത്യയിലെ പല നഗരങ്ങളിലും പടക്കം പൊട്ടിക്കുന്നതിനാൽ വായു ഗുണനിലവാര സൂചികയിൽ വൻ വർധനവുണ്ടായി. മാലിന്യം കത്തിക്കുന്നത് മലിനീകരണ തോത് വർധിപ്പിക്കുന്നതിനും കാരണമാകുന്നു.
കമ്മീഷൻ ഓഫ് എയർ ക്വാളിറ്റി മാനേജ്‌മെന്‍റിന്‍റെ (CAQM) ഉപസമിതി 12-പോയിന്‍റ് ആക്ഷൻ പ്ലാനിനൊപ്പം ദില്ലി-എൻസിആറിൽ ഗ്രേഡഡ് റെസ്‌പോൺസ് ആക്ഷൻ പ്ലാനിന്‍റെ (GRAP) രണ്ടാം ഘട്ട നടപടികൾ നടപ്പിലാക്കാനായതാണ് ദില്ലിയെ മോശം വായുനിലവാരമുള്ള നഗരങ്ങളുടെ ആദ്യ പത്തില്‍ നിന്നും പുറത്ത് കടക്കാന്‍ സാഹായിച്ചത്. എന്നാല്‍, ദീപാവലിക്ക് പിന്നാലെ ദില്ലി വീണ്ടും ഗുരുതരമായ വിഭാഗത്തിലേക്ക് വീണ്ടും എത്തിചേരുമെന്ന് കരുതുന്നു. ഏഷ്യയിലെ മോശം വായു ഗുണനിലവാരമുള്ള ആദ്യ പത്ത് നഗരങ്ങളില്‍ എട്ടും ഇന്ത്യയില്‍ നിന്ന് തെരഞ്ഞെടുക്കപ്പെട്ടപ്പോള്‍ ഗുണനിലവാരം കൂടിയ ആദ്യ പത്ത് നഗരങ്ങളില്‍ ഒരെറ്റ ഇന്ത്യന്‍ നഗരം മാത്രമാണുള്ളത്, ആന്ധ്രാപ്രദേശിലെ രാജമഹോന്ദ്രവാരം (73).
