ഡല്‍ഹി : അന്തര്‍ സംസ്ഥാന മയക്കുമരുന്ന് കടത്തുകാരനെ ഡല്‍ഹി പൊലീസ് അറസ്റ്റ് ചെയ്തു. രഹസ്യ വിവരത്തിന്റെ അടിസ്ഥാനത്തില്‍ സ്‌പെഷ്യല്‍ സെല്‍ നടത്തിയ പരിശോധനയിലാണ് ഇയാള്‍ പിടിയിലായത്. സീലംപൂര്‍ സ്വദേശിയായ മുഹമ്മദ് നദീം ഖാന്‍ എന്നയാളാണ് പിടിയിലായതെന്ന് പൊലീസ് അറിയിച്ചു. ഐഎസ്ബിടി കശ്മീരി ഗേറ്റിന് സമീപം വന്‍തോതില്‍ ഹെറോയിന്‍ വിതരണം ചെയ്യാന്‍ നദീം എത്തുമെന്ന് വ്യക്തമായ വിവരം ലഭിച്ചു. രാവിലെ 8 മുതല്‍ പരിശോധന നടത്തി. ബീഹാറിലെ സസാറാമില്‍ നിന്ന് പടിഞ്ഞാറന്‍ ഉത്തര്‍പ്രദേശ്, ഡല്‍ഹി എന്‍സിആര്‍ വഴി രാജ്യത്തിന്റെ മറ്റ് ഭാഗങ്ങളിലേക്ക് ഹെറോയിന്‍ ചരക്കുകള്‍ കൊണ്ടുവന്ന കേസില്‍ ഇയാള്‍ പ്രതിയാണെന്നും പൊലീസ് കൂട്ടിച്ചേര്‍ത്തു.
ഡല്‍ഹിയിലെ മയക്കുമരുന്ന് സംഘത്തിന്റെ തലവനെ നദീം പരിചയപ്പെട്ടു. പിന്നീട് അദ്ദേഹത്തിന്റെ മകളെ വിവാഹം കഴിച്ചു. തുടര്‍ന്ന് നദീം ഖാന്‍ ഡല്‍ഹിയിലും പരിസര പ്രദേശങ്ങളിലും ഭാര്യാപിതാവിന്റെ അനധികൃത മയക്കുമരുന്ന് വ്യാപാരം കൈകാര്യം ചെയ്യാന്‍ തുടങ്ങി. കോടതിയില്‍ ഹാജരാക്കിയ പ്രതിയെ കൂടുതല്‍ അന്വേഷണത്തിനായി പൊലീസ് കസ്റ്റഡിയില്‍ വിട്ടു.
