തിരുവനന്തപുരം: ശബരിമല തീർഥാടകരെ തെറ്റിദ്ധരിപ്പിച്ച കെഎസ്ആർടിസി ജീവനക്കാരൻ കോൺഗ്രസ് പ്രാദേശിക നേതാവ്. വെള്ളറട ഡിപ്പോയിലെ കണ്ടക്ടറും ട്രാൻസ്പോർട്ട് ഡെമോക്രാറ്റിക് ഫെഡറേഷൻ (ഐഎൻടിയുസി) യൂണിറ്റ് പ്രസിഡന്റുമായ ജി എസ് സനൽകുമാറാണ് കഴിഞ്ഞദിവസം വിവിധ സംസ്ഥാനങ്ങളിൽനിന്നെത്തിയ തീർഥാടകരെ പൊലീസിനെതിരെ തിരിയാൻ പ്രേരിപ്പിച്ചത്.
ജോലിക്കിടയിൽ ‘വില്ലേജ് വാർത്ത’ എന്ന ഓൺലൈൻ ചാനലിന് നൽകിയ അഭിമുഖത്തിൽ കലാപത്തിന് വഴിയൊരുക്കുന്ന രീതിയിൽ സനൽകുമാർ സംസാരിച്ചിരുന്നു. തീർഥാടകരെ തടയുന്നത് പൊലീസാണെന്നും എന്തെങ്കിലും പറയാനുണ്ടെങ്കിൽ പൊലീസിനോട് പറയാനും ആഹ്വാനം ചെയ്തു. ബസുകളിൽ ആളുകളെ കുത്തിനിറയ്ക്കുന്നത് പൊലീസാണ്. തീർഥാടകർക്ക് കുടിവെള്ളംപോലും ഒരുക്കുന്നില്ല. അയ്യപ്പൻമാരെ കൊല്ലാക്കൊല ചെയ്യുന്നു.
പൊലീസുകാർ മനഃപൂർവം തിരക്ക് സൃഷ്ടിക്കുവെന്നും പറഞ്ഞു. ഇത് സമൂഹമാധ്യമങ്ങളിൽ പ്രചരിപ്പിച്ചു. എം പാനൽ ജീവനക്കാരനായിരുന്ന സനൽകുമാറിനെ ഉമ്മൻചാണ്ടി സർക്കാരാണ് സ്ഥിരപ്പെടുത്തിയത്.
