മഡ്ഗാവ് : ഇന്ത്യൻ സൂപ്പർ ലീഗ് ഫുട്ബോളിന് ആശങ്കയായി കോവിഡ്. എടികെ മോഹൻ ബഗാൻ ടീമിലെ കളിക്കാർ കോവിഡ് പോസിറ്റീവ് ആയതിനെത്തുടർന്ന് ഇന്നലെ ഒഡീഷ എഫ്സിയുമായി നടക്കേണ്ടിയിരുന്ന മത്സരം മാറ്റിവച്ചു. പുതിയ തീയതി പിന്നീട് പ്രഖ്യാപിക്കുമെന്ന് സംഘാടകർ അറിയിച്ചു. ബഗാൻ താരങ്ങളായ റോയ് കൃഷ്ണ, സുഭാഷിഷ് ബോസ്, കാൾ മക്ഹ്യൂ എന്നിവരാണ് പോസിറ്റീവ് ആയതെന്നാണ് വിവരം. ഈയിടെ ക്രൊയേഷ്യൻ ലീഗിൽ നിന്നു മടങ്ങിയെത്തിയ സന്ദേശ് ജിങ്കാനും പോസിറ്റീവ് ആണെന്നു റിപ്പോർട്ടുകളുണ്ട്. കാണികൾക്കു പ്രവേശനമില്ലാതെ, ഗോവയിലെ 3 സ്റ്റേഡിയങ്ങളിലായാണ് ഐഎസ്എൽ നടക്കുന്നത്.
