ലുധിയാന (പഞ്ചാബ്) ∙ ബോളിവുഡ്, പഞ്ചാബി സിനിമകളിലൂടെ പ്രശസ്തനായ നടൻ മംഗൾ ധില്ലൻ അന്തരിച്ചു. അർബുദ ബാധിതനായ അദ്ദേഹം ലുധിയാനയിലെ സ്വകാര്യ ആശുപത്രിയിൽ ചികിത്സയിലായിരുന്നു. നടൻ യശ്പാൽ ശർമയാണ് വിയോഗവാർത്ത സ്ഥിരീകരിച്ചത്.
നിർമാതാവും സംവിധായകനും എഴുത്തുകാരനുമായിരുന്നു മംഗൾ ധില്ലൻ. ദൂരദർശനിൽ സംപ്രേഷണം ചെയ്ത ഹിന്ദി സീരിയലുകളായ ജുനൂൻ, ബുനിയാദ് തുടങ്ങിയവയിലെ പ്രകടനമാണ് അദ്ദേഹത്തെ ജനപ്രിയനാക്കിയത്. നിരവധി പഞ്ചാബി സിനിമകളിൽ പ്രവർത്തിച്ച അദ്ദേഹം അവിടെയും വ്യക്തിമുദ്ര പതിപ്പിച്ചു.
ഖൂൻ ഭാരി മാങ്, ദയവാൻ, സഖ്മി ഔരത്ത്, വിശ്വാത്മ, പ്യാർ കാ ദേവത, അംബ, തൂഫാൻ സിങ്, ദലാൽ തുടങ്ങിയവയാണ് പ്രധാന സിനിമകൾ. കഥാ സാഗർ, കിസ്മത്ത്, ഗുട്ടാൻ, റിഷ്ത, പരം വീർചക്ര തുടങ്ങിയ പ്രശസ്ത ടിവി സീരിയലുകളിലും അഭിനയിച്ചു.
