പിറന്നാള്‍ ദിനത്തില്‍ പ്രിയപ്പെട്ടവര്‍ക്ക് സര്‍പ്രൈസ് നല്‍കാന്‍ ഇഷ്ടപ്പെടുന്നവരാണ് മിക്കയാളുകളും. അത്തരത്തില്‍ ഒരാള്‍ സുഹൃത്തിന് നല്‍കിയ ഒരു പിറന്നാള്‍ കേക്കാണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്. ആര്‍ട്ടിസ്റ്റ് പാബ്‌ളോ റോചാറ്റ് ആണ് ഈ കേക്ക് ഡിസൈന്‍ ചെയ്തത്. ഈ കേക്കിന് പിന്നിലുള്ള വീഡിയോയും റോചാറ്റ് ഇന്‍സ്റ്റഗ്രാമില്‍ പങ്കുവെച്ചിട്ടുണ്ട്.
ഒരു ഇന്‍സ്റ്റഗ്രാം ചാറ്റില്‍ നിന്നാണ് വീഡിയോ തുടങ്ങുന്നത്. ചാറ്റിലൂടെ സുഹൃത്തിന് പിറന്നാള്‍ ആശംസ അറിയിച്ച റോചാറ്റ് കേക്ക് ഉണ്ടാക്കാന്‍ പോകുകയാണെന്ന് അറിയിക്കുന്നു. ആ കേക്ക് ഇതുപോലെയായിരിക്കും കാണാന്‍ എന്നും അദ്ദേഹം പറയുന്നു. ഏതുപോലെ എന്ന് സുഹൃത്ത് തിരിച്ചുചോദിക്കുന്നുണ്ട്. ഇതുപോലെ എന്ന് റോചാറ്റ് വീണ്ടും മറുപടി നല്‍കുന്നു.
ഇതിന് പിന്നാലെ ഒരു വൈറ്റ് കേക്ക് വീഡിയോയില്‍ കാണുന്നു. എന്നാല്‍ കേക്ക് മുറിച്ചപ്പോഴാണ് എല്ലാവരും അമ്പരന്നത്. ഇന്‍സ്റ്റഗ്രാം ചാറ്റിനോട് സാമ്യം തോന്നിക്കുന്ന രീതിയിലാണ് ഈ കേക്കിന്റെ ഡിസൈന്‍. അതായത് കേക്കിന് അകത്ത് റോചാറ്റും സുഹൃത്തും തമ്മിലുള്ള ചാറ്റിന്റെ അതേ ഡിസൈന്‍ ആണ് ഉണ്ടായിരുന്നത്. ചാറ്റിലെ ഇമോജി റിയാക്ഷന്‍ വരെ സൂക്ഷ്മമായി ചേര്‍ത്തിട്ടുണ്ടായിരുന്നു ദിവസങ്ങള്‍ക്ക് മുമ്പ് ഇന്‍സ്റ്റഗ്രാമില്‍ പോസ്റ്റ് ചെയ്ത ഈ വീഡിയോ രണ്ട് കോടി ആളുകളാണ് ഇതുവരെ കണ്ടത്. 24 ലക്ഷം ആളുകള്‍ ലൈക്കും ചെയ്തു. ഇതിന് താഴെ നിരവധി പേര്‍ കമന്‍റുകളുമായി എത്തുകയും ചെയ്തു.
