ദില്ലി: കശ്മീരില്‍ ദുരൂഹസാഹചര്യത്തില്‍ കാണാതായ സൈനികനായുള്ള തിരച്ചില്‍ തുടരുന്നു. കശ്മീരിലെ കുല്‍ഗാം ഏരിയയില്‍ നിന്നാണ് അവധിക്ക് നാട്ടിലെത്തി ജാവേദ് അഹമ്മദ് വാനി എന്ന സൈനികനെ കാണാതായത്. ഇദ്ദേഹത്തിന്‌റെ കാര്‍ ഉപേക്ഷിക്കപ്പെട്ട നിലയില്‍ കണ്ടെത്തിയിരുന്നു. കാറില്‍ രക്തക്കറ കണ്ടതോടെയാണ് ദുരൂഹതയേറിയത്.
അവധി കഴിഞ്ഞ് ഇന്ന് ലേയില്‍ ഇന്ന് ജോലിക്ക് തിരിച്ചു കയറേണ്ടതായിരുന്നു. സൈനികനെ കാണാതായതാണോ തട്ടിക്കൊണ്ടുപോയതാണോ എന്നതില്‍ ഇതുവരെ സ്ഥിരീകരണമുണ്ടായിട്ടില്ല. ലേ-ലഡാക്കിലായിരുന്ന ജാവേദ് അഹമ്മദ് അവധിക്ക് സ്വന്തം നാട്ടിലെത്തിയതായിരുന്നു. ഇന്ന് അവധി കഴിഞ്ഞ് തിരിച്ചു പോകാനിരിക്കേയാണ് ശനിയാഴ്ച്ച കാണാതാകുന്നത്. ശനിയാഴ്ച്ച വൈകിട്ട് വീട്ടില്‍ നിന്നും മാര്‍ക്കറ്റിലേക്ക് പോയതായിരുന്നു. ഏറെ വൈകിയിട്ടും ജാവേദ് മടങ്ങി വരാതിരുന്നതിനെ തുടര്‍ന്നാണ് വീട്ടുകാര്‍ അന്വേഷണം ആരംഭിച്ചത്. തിരച്ചിലില്‍ മാര്‍ക്കറ്റിന് സമീപം ജാവേദ് സഞ്ചരിച്ച കാര്‍ ഉപേക്ഷിക്കപ്പെട്ട നിലയില്‍ കണ്ടെത്തി.
