തിരുവനന്തപുരം: കേരള പവർബോർഡ് ഓഫിസേഴ്സ് ഫെഡറേഷൻ സംസ്ഥാന കമ്മിറ്റിയുടെ ഫണ്ടിൽനിന്നു 12 ലക്ഷം രൂപ തട്ടിയെടുത്തെന്ന പരാതിയിൽ കന്റോൺമെന്റ് പോലീസ് കേസെടുത്ത് അന്വേഷണം ആരംഭിച്ചു. സംഘടനയുടെ സംസ്ഥാന ഭാരവാഹികളായിരുന്ന ബിജുപ്രകാശ്, മോഹനൻ, അശോക് ഷെർലക്കർ എന്നിവർക്കെതിരെയാണു കേസ്.
സംഘടനയുടെ വ്യാജ മിനിറ്റ്‌സ് ഉപയോഗിച്ച് 2021 ഡിസംബർ മാസത്തിൽ 12 ലക്ഷംരൂപ അനധികൃതമായി പിൻവലിച്ചെന്നാണ് സംഘടനയുടെ ട്രഷറർ എ.ഷാജിയുടെ പരാതി. സംഘടനയുടെ പ്രസിഡന്റ്, ജനറൽ സെക്രട്ടറി, ട്രഷറർ എന്നിവരെ മാറ്റി പകരം പ്രതിസ്ഥാനത്തുള്ളവർ ആ സ്ഥാനങ്ങൾ ഏറ്റെടുത്തതായി മിനിറ്റ്സിൽ രേഖപ്പെടുത്തിയതായും പരാതിയിൽ പറയുന്നു.
