പൂക്കോട്ടുംപാടം > നാടൻ തോക്കുകളും തിരകളുമായി യുവാവ് മലപ്പുറം പൂക്കോട്ടുംപാടം പൊലീസിന്റെ പിടിയിലായി. ചെട്ടിപ്പാടം പൂവക്കുന്നിൽ രാജേഷാണ് (43 ) പിടിയിലായത്. പൊലീസിന് ലഭിച്ച രഹസ്യ വിവരത്തെ തുടർന്ന് രാജേഷിന്റെ ഉടമസ്ഥതയിലുള്ള കമുകിൻ തോട്ടത്തിലെ പമ്പ് ഹൗസിൽ നിന്നാണ് തോക്കുകളും തിരകളും കണ്ടെത്തിയത്. ഒരു ഒറ്റ ക്കുഴൽ തോക്കും ഒരു റിവോൾവറും തിരകൾ നിറക്കാനുപയോഗിക്കുന്ന ഉപകരണങ്ങളും പിടിച്ചെടുത്തവയിൽ ഉൾപ്പെടും.
പൂക്കോട്ടുംപാടം സ്റ്റേഷനിലെ എസ് ഐ മാരായ പി ജയകൃഷ്ണൻ, ബി തോമസ്, സതീഷ് കുമാർ, സിപിഓമാരായ എം എസ് സലീൽബാബു, അർഷിദ്, സാജിദ് എന്നിവരടങ്ങുന്ന സംഘമാണ് പരിശോധനക്ക് നേതൃത്വം നൽകിയത്. സംഭവ സ്ഥലത്തു നിന്നും പിടികൂടിയ പ്രതിയെ നിലമ്പൂർ കോടതിയിൽ ഹാജരാക്കി റിമാൻഡ് ചെയ്തു. മാവോയിസ്റ്റ് ഭീഷണി നിലനിൽക്കുന്ന പ്രദേശമായതിനാൽ വിശദമായ അന്വേഷണം നടത്താനാണ് പൊലീസ് തീരുമാനം.
