ഗോവ : 2022ലെ ആദ്യ മത്സരത്തിനായി ബ്ലാസ്റ്റേഴ്സ് ഇന്നിറങ്ങും. കരുത്തരായ എഫ്സി ഗോവയാണ് ബ്ലാസ്റ്റേഴ്സിന്റെ എതിരാളികള്. ഗോവ തിലക് മൈതാനില് രാത്രി 7.30നാണ് മത്സരം. തുടര്ച്ചയായ 7 മത്സരങ്ങളില് പരാജയമറിയാതെ തകര്പ്പന് ഫോമിലാണ് ബ്ലാസ്റ്റേഴ്സ്. ഉദ്ഘാടന മത്സരത്തില് എടികെയോട് പരാജയപ്പെട്ടതിനു ശേഷം ബ്ലാസ്റ്റേഴ്സ് പിന്നീട് പരാജയമറിഞ്ഞിട്ടില്ല. ഐഎസ്എല് ചരിത്രത്തിലെ തന്നെ ബ്ലാസ്റ്റേഴ്സിന്റെ ഏറ്റവും മികച്ച അണ്ബീറ്റണ് റണ് ആണിത്. 8 മത്സരങ്ങളില് 3 ജയം സഹിതം 13 പോയിന്റുള്ള ബ്ലാസ്റ്റേഴ്സ് പോയിന്റ് പട്ടികയില് അഞ്ചാമതാണ്. ഇന്നത്തെ മത്സരത്തില് വിജയിച്ചാല് മുംബൈ സിറ്റിക്കൊപ്പം പോയിന്റ് ടേബിളില് ഒന്നാമതെത്താന് ബ്ലാസ്റ്റേഴ്സിനു കഴിയും. ഗോവയാവട്ടെ, സീസണില് ആകെ രണ്ട് മത്സരങ്ങള് മാത്രമേ വിജയിച്ചിട്ടുള്ളൂ.
