കൊച്ചി> സങ്കടങ്ങളുടെ കടലിരമ്പം ഉള്ളിലടക്കി ലാൽ. സ്വന്തം പേരിലും ജീവിതത്തിലും ഒപ്പമുണ്ടായിരുന്ന ആത്മസുഹൃത്തിന്റെ വേർപാടിൽ ലാൽ ഉരുകയായിരുന്നു. ചൊവ്വ വൈകിട്ടോടെ ആശുപത്രിയിലെത്തി. സിദ്ദിഖിന്റെ കുടുബാംഗളെ കണ്ടു. ആശുപത്രിയിലുണ്ടായിരുന്ന ചലച്ചിത്രമേഖലയിലെ സഹപ്രവർത്തകരോട് സംസാരിച്ചു. ഇടക്ക് ആശുപത്രിയിൽ നിന്നും പുറത്തേക്ക് പോയെങ്കിലും മടങ്ങിയെത്തി. ഒരിക്കലും സംഭവിക്കരുതെന്ന് ആഗ്രഹിച്ചത് അധികം വൈകാതെയുണ്ടായി. ലാലിന്റെ ഉള്ളം നുറുങ്ങി.
രാത്രി 9.15ന് സിദ്ദിഖിന്റെ മരണം അറിയിക്കാൻ ബി ഉണ്ണികൃഷ്ണനൊപ്പം ലാലും മാധ്യമങ്ങൾക്ക് മുന്നിലെത്തി. ഉണ്ണികൃഷ്ണൻ സംസ്കാര വിവരങ്ങളടക്കം നൽകുന്നത് നിബ്ദനായി കേട്ടുനിന്നു. ശേഷം വീണ്ടും ആശുപത്രിക്ക് അകത്തേക്ക്. ഇരുവർക്കും പുറമേസംവിധായകരായ ലാൽജോസ്, നടന്മാരായ ദിലീപ്, റഹ്മാൻ, സിദ്ദിഖ്, ടിനിടോം ഉൾപ്പെടെ ചലച്ചിത്ര മേഖലയിലെ ആശുപത്രിയിലെത്തിയിരുന്നു.
കഴിഞ്ഞ മാസമാണ് സിദ്ദിഖിനെ ആശുപത്രിയിൽ പ്രവേശിപ്പിച്ചത്. ചികിത്സയുടെ ഒരുഘട്ടത്തിൽ സിദ്ദിഖിന്റെ നില ഗുരുതരാണെന്ന് അറിഞ്ഞതോടെ ചലച്ചിത്ര ലോകവും ആസ്വാദകരും ആശങ്കയിലായി. എന്നാൽ പിന്നീട് നിലമെച്ചപ്പെട്ടതോടെ ആശങ്കവഴിമാറി. രോഗത്തെ അതിജീവിച്ച് സിദ്ദീഖ് മടങ്ങിയെത്തുമെന്ന പ്രതീക്ഷയിലായി. അതിനായുള്ള കാത്തിരിപ്പിലായിരുന്നു എല്ലാവരും. ഇതിനിടയിലാണ് വില്ലനായി ഹൃദയാഘാതമുണ്ടായത്. ഉള്ളം തുറന്ന് ചിരിപ്പിച്ച പ്രിയസംവിധായകന്റെ വേർപാടിൽ തേങ്ങുകയാണ് ആസ്വാദകർ.
