താനൂർ> സംസ്ഥാനത്തെ സഹകരണ സംഘങ്ങൾക്ക് നൽകിയ ആധുനിക സൗകര്യങ്ങളോടുകൂടിയ മത്സ്യബന്ധനവള്ളങ്ങൾ നീറ്റിലിറക്കി. താനൂർ ഹാർബറിൽ നടന്ന ചടങ്ങിൽ മന്ത്രി വി അബ്ദുറഹിമാൻ ഫ്ലാഗ് ഓഫ് ചെയ്തു. പരമ്പരാഗത മത്സ്യത്തൊഴിലാളികൾക്ക് ലാഭകരമായ മത്സ്യബന്ധനം നടത്തുന്നതിനായാണ് ആധുനിക സൗകര്യങ്ങളോടുകൂടിയ വള്ളങ്ങൾ നൽകിയതെന്നും മന്ത്രി പറഞ്ഞു. സംസ്ഥാനത്തെ 10 മത്സ്യബന്ധന യാനങ്ങളിൽ മൂന്നെണ്ണം മലപ്പുറം ജില്ലയിലാണ്. അതിൽ രണ്ടെണ്ണം താനൂരിലും. വരും സമയങ്ങളിൽ കൂടുതൽ സംഘങ്ങൾക്ക് യാനങ്ങൾ നൽകുകയാണ് സർക്കാർ ലക്ഷ്യമിടുന്നതെന്നും മന്ത്രി കൂട്ടിചേർത്തു.ചടങ്ങിൽ മത്സ്യഫെഡ് ഡയറക്ടർ പി പി സൈതലവി അധ്യക്ഷനായി. മത്സ്യഫെഡ് ജില്ലാ മാനേജർ മനോജ് റിപ്പോർട്ട് അവതരിപ്പിച്ചു. ബ്ലോക്ക് പഞ്ചായത്ത് അംഗം നാസർ പോളാട്ട്, നഗരസഭ കൗൺസിലർ പി ടി അക്ബർ, സമദ് താനാളൂർ, കെ ടി ശശി, കെ പി സൈനുദ്ദീൻ, സഹകരണ സംഘം പ്രസിഡന്റുമാരായ എം പി മുഹമ്മദ് സറാർ, സെയ്തുമോൻ എന്നിവർ സന്നിഹിതരായിരുന്നു. പൊന്നാനി ഫിഷറീസ് ഡെപ്യൂട്ടി ഡയറക്ടർ പി കെ രഞ്ജിനി സ്വാഗതം പറഞ്ഞു.
ഉണ്യാൽ തേവർകടപ്പുറം- ചീരാൻകടപ്പുറം മത്സ്യ സഹകരണ സംഘം, താനൂർ ടൗൺ മത്സ്യത്തൊഴിലാളി ക്ഷേമ സഹകരണ സംഘം എന്നിവർക്കാണ് താനൂരിൽ യാനങ്ങൾ ലഭിച്ചത്. പരമ്പരാഗത മത്സ്യത്തൊഴിലാളികൾക്ക് പ്രത്യേക പരിഗണന നൽകി 1.57കോടി ചെലവ് വരുന്ന വള്ളമാണ് നൽകിയത്. ഹൈഡ്രോളിക് സംവിധാനത്തിലാണ് ബോട്ട് പ്രവർത്തിക്കുന്നത്. 200 നോട്ടിക്കൽ മൈൽ വരെ മത്സ്യബന്ധനം നടത്താനുള്ള ലൈസൻസ് അടക്കം സർക്കാർ അനുവദിച്ചിട്ടുണ്ട്.
കൊച്ചിൻ ഷിപ്പിയാർഡിനു കീഴിൽ ഉഡുപ്പിക്കു സമീപമുള്ള മാൽപ്പേ യാർഡിൽ നിന്നും ആധുനിക രീതിയിലുള്ള ചൂണ്ടയും ഗിൽനെറ്റ് വലകളും വള്ളത്തിൽ ഘടിപ്പിച്ചിട്ടുണ്ട്. ലോങ്ലൈനർവിഞ്ച്, ഗിൽനെറ്റ് ഹോളർ, അത്യാധുനിക സാങ്കേതികവിദ്യയിൽ പ്രവർത്തിക്കുന്ന ജിപിഎസ് ഉൾപ്പെടെയുള്ള ആശയവിനിമയ ഉപകരണങ്ങൾ, ദുരന്ത മുന്നറിയിപ്പ്, മാഗ്നെറ്റിക് കോമ്പസ് എന്നിവ സജ്ജീകരിച്ചിട്ടുണ്ട്. മറ്റു വള്ളങ്ങളുടെ ഗതി ഓട്ടോമാറ്റിക്കായി ചൂണ്ടിക്കാണിക്കുന്ന സൗകര്യവുമുണ്ട്. 22.70 മീറ്റർ നീളവും, 6.40 മീറ്റർ വീതിയുമുണ്ട് വള്ളത്തിന്. 10,000 ലിറ്റർ ശുദ്ധജലം സംഭരിക്കാൻ ശേഷിയുള്ള ടാങ്ക്, 70 ക്യൂബിക് മീറ്റർ ശേഷിയുള്ള മത്സ്യസംഭരണി, എട്ടുപേർക്ക് വിശ്രമിക്കാനുള്ള സൗകര്യം, അടുക്കള എന്നിവയും വള്ളത്തിലുണ്ട്.
