കൊല്ലം> കെഎസ്‌ആർടിസിയിൽ ജീവനക്കാർക്ക്‌ ലഭിക്കാനുള്ള എല്ലാ ആനുകൂല്യങ്ങളും നൽകുമെന്നും പിഎസ്‌സി റാങ്ക്‌ ലിസ്‌റ്റിലുള്ളവരുടെ നിയമനം കഴിഞ്ഞാലുടൻ അവശേഷിക്കുന്ന എംപാനലുകാരെകൂടി തിരിച്ചെടുക്കുമെന്നും ഗതാഗത മന്ത്രി ആന്റണി രാജു പറഞ്ഞു. കൊല്ലത്ത്‌ കെഎസ്‌ആർടിഇഎ (സിഐടിയു) സംസ്ഥാന സമ്മേളനത്തിൽ സംസാരിക്കുകയായിരുന്നു മന്ത്രി.
മൂവായിരം എംപാനലുകാരെ തിരിച്ചെടുത്തിട്ടുണ്ട്‌. ഡ്രൈവർമാർക്കും കണ്ടക്‌ടർമാർക്കും രണ്ടുസെറ്റ്‌ യൂണിഫോം വിതരണംചെയ്യാൻ നടപടിയായി. മൂന്നരക്കോടിയുടെ അധികബാധ്യത ഇതിനായി ഏറ്റെടുക്കും. ആശ്രിതനിയമനം വേഗത്തിലാക്കും. വിജിലൻസ്‌ കേസുകൾ കുറച്ചുകൊണ്ടുവരും. അംഗീകൃത യൂണിയനുകളുമായി ആലോചിച്ച്‌ തൊഴിലാളികളുടെ ആശങ്ക പരിഹരിച്ചുമാത്രമേ മരവിപ്പിച്ച സ്ഥലമാറ്റ ഉത്തരവ്‌ നടപ്പാക്കൂ.
മാനേജ്‌മെന്റ്‌ പുറത്തിറക്കിയ സ്ഥലമാറ്റ ഉത്തരവ്‌ സർക്കാർ മരവിപ്പിച്ചത്‌ സിഐടിയു യൂണിയന്റെ ആവശ്യപ്രകാരമാണ്‌. ഷിഫ്‌റ്റ്‌ സമ്പ്രദായം ജീവനക്കാരുടെ ആശങ്കകൾ പരിഹരിച്ച്‌ നടപ്പാക്കും. ഷിഫ്‌റ്റ്‌ സമ്പ്രദായം സ്ഥാപനത്തെ സംരക്ഷിക്കാനാണ്‌. ഒരു ശരീരത്തിലെ ഇരുകണ്ണുകളെപൊലെ സ്വിഫ്‌റ്റ്‌ ബസുകളെ കാണണം. സിംഗിൾഡ്യൂട്ടി സംവിധാനവും അംഗീകൃത യൂണിയനുകൾ നിർദേശിക്കുംവിധം മാത്രമേ നടപ്പാക്കൂ.
ഭാവിയിൽ ഓർഡിനറി ബസുകളെ ഗ്രാമവണ്ടികളായി വിഭാവനംചെയ്യും. ഇതിനായി തദ്ദേശസ്ഥാപനങ്ങളുമായി കൈകോർക്കും. വികേന്ദ്രീകരണത്തിനും ജീവനക്കാരുടെ പ്രശനങ്ങൾക്ക്‌ പരിഹാരം കാണാനും മേഖലാഓഫീസുകൾ സ്ഥാപിക്കുന്നത്‌ പരിഗണനയിലാണ്‌.53 ഹരിത ഇന്ധന ബസുകൾകൂടി സർവീസ്‌ തുടങ്ങുമെന്നും മന്ത്രി പറഞ്ഞു.
സ്വാഗതസംഘം ചെയർമാൻ എസ്‌ ജയമോഹൻ അധ്യക്ഷനായി. സിപിഐ എം ജില്ലാ സെക്രട്ടറി എസ്‌ സുദേവൻ, സിഐടിയു അഖിലേന്ത്യ വൈസ്‌ പ്രസിഡന്റ്‌ ജെ മേഴ്‌സിക്കുട്ടിഅമ്മ, സംസ്ഥാന സെക്രട്ടറി കെ എസ്‌ സുനിൽകുമാർ, അസോസിയേഷൻ വർക്കിങ്‌ പ്രസിഡന്റ്‌ സി കെ ഹരികൃഷ്‌ണൻ എന്നിവർ പങ്കെടുത്തു.
