തിരുവനന്തപുരം > മേഖലാ അവലോകന യോഗങ്ങള്‍ വികസന പ്രശ്‌നങ്ങള്‍ ചര്‍ച്ച ചെയ്യുന്ന വേദിയായി മാറിയെന്ന്‌ മുഖ്യമന്ത്രി പിണറായി വിജയന്‍. പുതിയ ഭരണനിർവഹണ മാതൃകയാണ്‌ ഇത്‌. നാല്‌ മേഖലയിലെയും പ്രശ്‌നങ്ങളിൽ ഇടപെടാൻ ഇതിലൂടെ കഴിഞ്ഞു. പ്രശ്‌നങ്ങൾ സമയബന്ധിതമായി പരിഹരിക്കുമെന്നും മുഖ്യമന്ത്രി പറഞ്ഞു.
സംസ്ഥാനതലത്തില്‍ പരിഹരിക്കേണ്ട 697 പ്രശ്‌നങ്ങള്‍ കണ്ടെത്തി. 582 എണ്ണം പരിഹരിച്ചു കഴിഞ്ഞു. മറ്റുള്ളവയില്‍ നടപടി തുടരുന്നു. പദ്ധതിയുടെ ഗുണഫലങ്ങള്‍ ജനങ്ങളിലേക്ക് എത്തിക്കും. പ്രധാനപ്പെട്ട പ്രശ്‌നങ്ങൾ ഇതിനകം തീർപ്പാക്കിയിട്ടുണ്ട്‌. സംസ്ഥാന, ജില്ലാ തലത്തിൽ പരിഗണിക്കേണ്ട വിഷയങ്ങൾ ഇതിൽ ഉൾപ്പെടും. ബാക്കി പ്രശ്‌നപരിഹാരങ്ങൾ ബന്ധപ്പെട്ട മന്ത്രിമാരുടെ നേതൃത്വത്തിൽ പരിഹരിക്കുന്നതിനുള്ള നടപടികളാണ്‌ സ്വീകരിച്ചുവരുന്നത്‌.
93 ശതമാനം അതിദാരിദ്ര കുടുംബങ്ങളെ 2025 നവംബർ 1 ഓടെ അതിൽനിന്ന്‌ മോചിപ്പിക്കാനാകും. വയനാട്‌ തുരങ്കപാതയ്‌ക്ക്‌ ആവശ്യമായ അനുമതി ഈ വർഷം അവസാനം ലഭിക്കുമെന്നാണ്‌ പ്രതീക്ഷിക്കുന്നത്‌. അടുത്ത വർഷം മാർച്ചിൽ നിർമാണ ഉദ്‌ഘാടനം നടത്താനാകും. നാല്‌ വർഷത്തിനകം പദ്ധതി പൂർത്തിയാക്കാൻ സാധിക്കുമെന്നും മുഖ്യമന്ത്രി പറഞ്ഞു.
