കൊല്ലം : കൊല്ലം കളക്ട്രേറ്റ് ബോംബ് സ്ഫോടന കേസിലെ നാല് പ്രതികളുടെ റിമാൻറ്(remand) ഈ മാസം 30 വരെ നീട്ടി. മധുര സ്വദേശികളായ അബ്ബാസ് അലി, ദാവൂദ് സുലൈമാന്, ഷംസൂണ് കരിം രാജ, ഷംസുദീന് എന്നിവരാണ് കേസില് പ്രതികള്. ബേസ് മൂവ്മെൻറ് പ്രവർത്തകരാണിവർ. കൊല്ലം പ്രിന്സിപ്പല് സെഷന്സ് കോടതിയിലാണ് പൊലീസ് കുറ്റപത്രം സമര്പ്പിച്ചിരുന്നത്
സ്ഫോടന കേസിൽ ബേസ് മൂവ്മെൻറ് പ്രവർത്തകനായ മുഹമ്മദ് അയൂബിനെ മാപ്പുസാക്ഷിയാക്കിയിരുന്നു. ചോദ്യം ചെയ്യലിലും മറ്റ് അന്വേഷണങ്ങളിലും മുഹമ്മദ് അയൂബ് മാത്രമാണ് പൊലീസുമായി സഹകരിച്ചത്. സ്ഫോടനത്തില് മറ്റ് നാല് പേര്ക്കുള്ള പങ്കാളിത്തം വ്യക്തമാക്കുന്ന മൊഴിയാണ് മുഹമ്മദ് അയൂബ് നല്കിയത്. 2016 ജൂണ് 15നാണ് കൊല്ലം കളക്ടറേറ്റില് സ്ഫോടനമുണ്ടായത്.
മുന്സിഫ് കോടതിക്കും സബ് ട്രഷറിക്കുമിടയില് നിര്ത്തിയിട്ടിരുന്ന ജീപ്പിന് സമീപത്തായിരുന്നു സ്ഫോടനം. രണ്ട് ചോറ്റുപാത്രങ്ങള്ക്കുള്ളില് ഡിറ്റണേറ്ററുകളും ബാറ്ററിയും വെടിമരുന്നും നിറച്ചാണ് സ്ഫോടനം നടത്തിയത്. സംഭവത്തില് ഒരാള്ക്ക് പരിക്കേറ്റിരുന്നു. ആന്ധ്രപ്രദേശിലെ ചിറ്റൂര്, നെല്ലൂര്, കര്ണാടകത്തിലെ മൈസൂരു എന്നിവിടങ്ങളിലെ കോടതിവളപ്പില് ആ വര്ഷം സ്ഫോടനമുണ്ടായിരുന്നു. ഷംസൂണ് കരിം രാജയാണ് എല്ലായിടത്തും ബോംബ് സ്ഥാപിച്ചതെന്നാണ് പൊലീസ് കണ്ടെത്തിയത്.
