പേരാമ്പ്ര : 27-കാരിയെ മറ്റൊരാൾക്ക് പീഡിപ്പിക്കാൻ അവസരമൊരുക്കിയ കുറ്റത്തിന് ഭർത്താവ് അറസ്റ്റിൽ. ബലാത്സംഗ ക്കേസിൽ വേളം പെരുവയൽ സ്വദേശി അബ്ദുൾലത്തീഫാണ്‌ (35) അറസ്റ്റിലായത്. തൊട്ടിൽപ്പാലത്തിന് സമീപത്തെ ഒരുഹോട്ടലിലും യുവതി താമസിക്കുന്ന വാടകവീട്ടിലും വെച്ച് രണ്ടുതവണ പീഡിപ്പിച്ചുവെന്നാണ് പരാതി. ഇയാളുടെ അടുത്തേക്ക് വാഹനത്തിൽ എത്തിച്ച് നൽകുകയും മറ്റൊരിക്കൽ വാടക വീട്ടിലേക്ക് കൂട്ടിക്കൊണ്ട് വരുകയും ചെയ്ത് പണം കൈപ്പറ്റിയെന്ന കുറ്റത്തിനാണ് ഭർത്താവിനെ പേരാമ്പ്ര സി.ഐ. എം. സജീവ് കുമാർ അറസ്റ്റ് ചെയ്തത്. അബ്ദുൾ ലത്തീഫിന്റെ കാറും പോലീസ് കസ്റ്റഡിയിലെടുത്തിട്ടുണ്ട്. പേരാമ്പ്ര മജിസ്‌ട്രേറ്റ് കോടതി ഇയാളെ റിമാൻഡ്‌ ചെയ്തു.
ഓഗസ്റ്റ്‌ 14-ന് യുവതിയെ കാണാതായെന്ന് ഉമ്മ പോലീസിൽ പരാതി നൽകിയതോടെയാണ് സംഭവം പോലീസിന്റെ മുന്നിലെത്തുന്നത്. ആശുപത്രിയിൽ ഉമ്മയ്ക്കൊപ്പം ഡോക്ടറെ കാണാനായി പോയ സമയത്താണ് യുവതിയെ കാണാതാകുന്നത്. തുടർന്ന് 15-ന് പേരാമ്പ്ര പോലീസ് സ്റ്റേഷനിൽ ഹാജരാവുകയായിരുന്നു.
