കോഴിക്കോട്∙ തീവയ്പു നടന്ന ട്രെയിനിൽ പ്രതി ഷാറുഖ് സെയ്ഫിയെ സഹായിക്കാൻ ആരെങ്കിലും ഉണ്ടായിരുന്നോ എന്ന അന്വേഷണം വിപുലമാക്കുന്നു. ഡി1 കോച്ചിൽ തീവയ്പ് ഉണ്ടായ സമയത്തു സമീപത്തെ 5 കോച്ചുകളിലെ അപായച്ചങ്ങല വലിച്ചിട്ടുണ്ട്.
ഭയന്ന യാത്രക്കാർ മറ്റു കോച്ചുകളിലേക്ക് ഓടിയിരുന്നു. ഇവരാകാം അപായച്ചങ്ങല വലിച്ചതെന്നാണു പ്രാഥമിക നിഗമനമെങ്കിലും മറ്റു സാധ്യതകളും പരിശോധിക്കുന്നുണ്ട്. ട്രെയിൻ നിർത്തുമ്പോൾ ഡി1 കോച്ച് കോരപ്പുഴ പാലത്തിനു മുകളിലായിരുന്നു. ലോക്കോ പൈലറ്റ് എത്തി 5 കോച്ചുകളിലെയും അപായച്ചങ്ങല ശരിയാക്കിയ ശേഷമാണു യാത്ര പുനരാരംഭിച്ചത്.
ആക്രമണം നടന്ന രാത്രി പ്രതിയുടെ വസ്ത്രങ്ങളടങ്ങിയ ബാഗ് പാളത്തിൽ നഷ്ടപ്പെട്ട ശേഷവും കണ്ണൂരിലെത്തിയപ്പോൾ മാറിധരിക്കാൻ ഷർട്ട് ലഭിച്ചത് എങ്ങനെയെന്നും അന്വേഷിക്കുന്നു. പ്രതി ഷാറുഖ് സെയ്ഫി ആരോഗ്യപ്രശ്നങ്ങൾ ചൂണ്ടിക്കാട്ടി ചോദ്യം ചെയ്യലിനോടു സഹകരിക്കുന്നില്ലെന്നു പൊലീസ് പറയുന്നു. പ്രതിയെ ഇന്നലെയും ഡോക്ടർമാർ പൊലീസ് ക്യാംപിലെത്തി പരിശോധിച്ചു. ആരോഗ്യം ത്യപ്തികരമാണ്.
ചെറു സ്റ്റേഷനുകളിൽ ആർപിഎഫിനെ വിന്യസിച്ചു
തീവയ്പു കേസിന്റെ പശ്ചാത്തലത്തിൽ ചെറു സ്റ്റേഷനുകളിൽ റെയിൽവേ പ്രൊട്ടക്‌ഷൻ ഫോഴ്സ് (ആർപിഎഫ്) ഉദ്യോഗസ്ഥരെ വിന്യസിച്ചു. അതേസമയം ട്രെയിനിലെ സുരക്ഷ എങ്ങനെ വർധിപ്പിക്കുമെന്നതിൽ ഇതുവരെ തീരുമാനമെടുക്കാൻ റെയിൽവേക്കു കഴിഞ്ഞിട്ടില്ല.
തീവയ്പിനു പിന്നാലെ പ്രധാന സ്റ്റേഷനുകളിലെല്ലാം ഡോഗ് സ്ക്വാഡ് ഉൾപ്പെടെ പരിശോധനകൾ നടത്താൻ നിർദേശമുണ്ടായിരുന്നു. യാത്രക്കാരുടെ എണ്ണം കണക്കിലെടുത്താൽ ഇതു പ്രായോഗികമല്ലെന്ന് ഉദ്യോഗസ്ഥർ തന്നെ അറിയിച്ചു. സിസിടിവി പോലുള്ള സാങ്കേതിക വിദ്യ ഉപയോഗിച്ച് സുരക്ഷ വർധിപ്പിക്കുമെന്നാണ് ആർപിഎഫ് ഐജി ഈശ്വർ റാവു കഴിഞ്ഞ ദിവസം പറഞ്ഞത്.
പ്രധാന സ്റ്റേഷനുകളിൽ സ്കാനിങ് കേന്ദ്രങ്ങൾ സജ്ജമാക്കിയിട്ടുണ്ടെങ്കിലും പ്രായോഗിക ബുദ്ധിമുട്ടുള്ളതിനാൽ സാധാരണ ദിവസങ്ങളിൽ പരിശോധന നടത്താറില്ല. സംശയമുള്ളവരെ മാത്രം പരിശോധിക്കുകയും സംശയാസ്പദമായ രീതിയിൽ കാണുന്ന ലഗേജുകൾ പരിശോധിക്കുകയുമാണ് ചെയ്യാറ്.
