തിരുവനന്തപുരം∙ കെപിസിസി അധ്യക്ഷനെ ഉൾപ്പെടെ തീരുമാനിക്കാൻ സോണിയ ഗാന്ധിയെ ചുമതലപ്പെടുത്തി കെപിസിസി ജനറൽ ബോഡിയിൽ പ്രമേയം അവതരിപ്പിച്ചു. രമേശ് ചെന്നിത്തലയാണു പ്രമേയം അവതരിപ്പിച്ചത്. കെ.സുധാകരൻ കെപിസിസി പ്രസിഡന്റായി തുടരാനാണു നിലവിലെ ധാരണ. സംഘടനാ തിരഞ്ഞെടുപ്പിന്റെ സാഹചര്യമായതിനാൽ അതുവരെ സുധാകരൻ കാവൽ പ്രസിഡന്റായി തുടരും.
പ്രസിഡന്റ്, കെപിസിസി ഭാരവാഹികൾ, നിര്‍വാഹക സമിതി അംഗങ്ങൾ, എഐസിസി അംഗങ്ങൾ, സംസ്ഥാന തിരഞ്ഞെടുപ്പ് സമിതി എന്നിവരെ ഹൈക്കമാൻഡിനു തീരുമാനിക്കാമെന്നു പ്രമേയത്തിൽ പറയുന്നു. പ്രതിപക്ഷ നേതാവ് വി.ഡി.സതീശൻ, കെ.മുരളീധരൻ എംപി, കെ.സി.ജോസഫ്, കൊടിക്കുന്നിൽ സുരേഷ് എംപി, എം.എം.ഹസൻ തുടങ്ങിയവർ പിൻതാങ്ങി. എഐസിസി തിരഞ്ഞെടുപ്പിനു മുൻ‌പ് സംസ്ഥാനതല ഭാരവാഹികളെ നിശ്ചയിക്കേണ്ടതുണ്ട്. നേരത്തെ ഭാരവാഹികളെ സംബന്ധിച്ചു സമവായമായതിനാൽ മത്സരം ഉണ്ടായില്ല.
കെപിസിസി ആസ്ഥാനമായ ഇന്ദിരാഭവനിലായിരുന്നു പുതിയ കെപിസിസി അംഗങ്ങളുൾപ്പെട്ട ജനറൽ ബോഡി യോഗം. സംഘടനാ തിരഞ്ഞെടുപ്പിനുള്ള പ്രദേശ് റിട്ടേണിങ് ഓഫിസർ ജി.പരമേശ്വര, അസിസ്റ്റന്റ് റിട്ടേണിങ് ഓഫിസർ അറിവ് അഴകൻ, കേരളത്തിന്റെ ചുമതലയുള്ള എഐസിസി ജനറൽ സെക്രട്ടറി താരിഖ് അൻവർ എന്നിവരുടെ സാന്നിധ്യത്തിൽ ചേർന്ന യോഗം സംഘടനാ തിരഞ്ഞെടുപ്പിന്റെ ഭാഗമായ നടപടിക്രമങ്ങൾ ഔപചാരികമായി പൂർത്തിയാക്കി. പരമേശ്വര ആമുഖപ്രസംഗം നടത്തി.
