കൊച്ചി: എറണാകുളം ജില്ലയിലെ പെരുമ്പാവൂരിൽ ഭാര്യയെ വെട്ടിക്കൊലപ്പെടുത്തിയ കേസിൽ ഭർത്താവ് പിടിയിൽ. അസാം സ്വദേശി ഫക്രുദ്ദീനെയാണ് പ്രത്യേക അന്വേഷണ സംഘം അസാമിലെ ജൂരിയയിൽ നിന്നും പിടികൂടിയത്. കഴിഞ്ഞ ഒന്നിന് രാത്രി പെരുമ്പാവൂർ കണ്ടന്തറയിലാണ് സംഭവം. ഭാര്യ ഖാലിദ ഖാത്തൂനിനെ ഫോൺ ഉപയോഗിക്കുന്നതിലുള്ള വിരോധത്തെ തുടർന്ന് വെട്ടിക്കൊലപ്പെടുത്തുകയായിരുന്നു.
പെരുമ്പാവൂരിലെ ഫ്ലൈവുഡ് കമ്പനി തോഴിലാളിയായിരുന്നു അസാം സ്വദേശി ഫക്രൂദീൻ. ഇയാൾക്കൊപ്പമാണ് ഭാര്യ ഖാലിദാ ഖാത്തൂനും പെരുമ്പാവൂരിൽ താമസിച്ചിരുന്നത്. ഏപ്രിൽ ഒന്നിന് വീട്ടിൽ ഖാലിദ വെട്ടേറ്റ് കിടക്കുന്നത് ആദ്യം കണ്ടത് ഇവരുടെ മകനാണ്. കുട്ടി ഉടൻ നാട്ടുകാരെയും പോലീസിനെയും വിവരം അറിയിക്കുകയായിരുന്നു. പെരുമ്പാവൂര് പോലീസിന്റെ അന്വേഷണത്തിൽ ഖാലിദയുടെ ഭര്ത്താവ് ഫക്രൂദീനാണ് കുറ്റവാളിയെന്ന് വ്യക്തമായി.
