തിരുവനന്തപുരം : പുതിയ മദ്യനയത്തിന്റെ ഭാഗമായി മദ്യശാലകളുടെ ലൈസൻസ് ഫീസ് വർധിപ്പിച്ചേക്കും. ബാറുകളുടെയും ക്ലബുകളുടെയും ലൈസൻസും ഇതര സേവനങ്ങളുടെ ലൈസൻസ് ഫീസും കൂട്ടാനാണ് ആലോചന. ഫീസ് വർധിപ്പിക്കാൻ ആലോചിക്കുന്ന കാര്യം സർക്കാർ ലൈസൻസികളെ അറിയിച്ചു. ബാറുകൾക്ക് 30 ലക്ഷം രൂപയാണ് നിലവിൽ ലൈസൻസ് ഫീസ്. ക്ലബ് ലൈസൻസിന് 20 ലക്ഷം രൂപ. ബീയർ-വൈൻ പാർലറുകൾക്ക് നാലു ലക്ഷം രൂപയാണ് ലൈസൻസ് ഫീസ്. ഒന്നാം പിണറായി സർക്കാരിന്റെ കാലത്തും ഒരു തവണ ഫീസ് വർധിപ്പിച്ചിരുന്നു. കോവിഡ് സാഹചര്യത്തിൽ ഫീസ് വർധിപ്പിക്കരുതെന്നാണ് ബാർ ഓണേഴ്സ് അസോസിയേഷന്റെ നിലപാട്. പഴങ്ങളിൽ നിന്ന് വൈൻ ഉൽപാദിപ്പിക്കാൻ ചട്ടങ്ങൾക്ക് അംഗീകാരമായതോടെ വൈനറികളും നിലവിൽവരും. സർക്കാർ മേഖലയിലായിരിക്കും ഉൽപാദനം. കശുമാങ്ങ, വാഴപ്പഴം, പൈനാപ്പിള്‍, ജാതിക്ക എന്നിവയിൽനിന്ന് വൈൻ നിർമിക്കാനാണ് ആലോചിക്കുന്നത്. ചുമതല ബവ‌്റിജസ് കോർപറേഷന് ആയിരിക്കും.
