തിരുവനന്തപുരം: ബൈക്ക് മോഷണ കേസിലെ പ്രതി അറസ്റ്റിൽ. വെള്ളറട പുലിയൂർ ശാലയിൽ വീടിനു മുൻവശത്ത് പാർക്ക് ചെയ്തിരുന്ന ബൈക്ക് മോഷ്ടിച്ച കേസിലാണ് വെള്ളറട, മുള്ളിലുവിള സ്വദേശിയായ സന്തോഷിനെ (44) വെള്ളറട പൊലീസ് അറസ്റ്റ് ചെയ്തത്. ദിവസങ്ങൾക്കു മുമ്പ് വീടിന് മുൻവശത്ത് പാർക്ക് ചെയ്തിരുന്ന ബൈക്കാണ് സന്തോഷ് മോഷ്ടിച്ചത്. ബൈക്ക് മോഷ്ടിച്ചു കൊണ്ടുപോകുന്ന സിസിടിവി ദൃശ്യങ്ങള്‍ ലഭിച്ചിരുന്നു. ഇതാണ് പ്രതിയെ തിരിച്ചറിയാൻ സഹായകമായത്. തുടർന്ന് വെള്ളറട പോലീസ് നടത്തിയ അന്വേഷണത്തിൽ പ്രതിയെ പിടികൂടുകയായിരുന്നു. സന്തോഷിനെതിരെ പാറശ്ശാല പൊലീസ് സ്റ്റേഷനിലും സമാനമായ കേസ് നിലവിലുള്ളതായി പൊലീസ് അറിയിച്ചു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
