കോട്ടയം∙ വളര്‍ത്തു കാളയുടെ കുത്തേറ്റ് ഗൃഹനാഥന്‍ മരിച്ചു. വാഴൂര്‍ കന്നുകുഴി ആലുംമൂട്ടില്‍ റെജി ജോര്‍ജ് (56) ആണ് മരിച്ചത്. കാളയുടെ ആക്രമണത്തില്‍ ഗുരുതരമായി പരുക്കേറ്റ റെജിയുടെ ഭാര്യ ഡാര്‍ളിയെ പാലായിലെ സ്വകാര്യ ആശുപത്രിയില്‍ പ്രവേശിപ്പിച്ചു. വെള്ളിയാഴ്ച രാവിലെ പതിനൊന്നരയോടെയായിരുന്നു സംഭവം.
വീടിനോട് ചേര്‍ന്നുള്ള പറമ്പില്‍ തീറ്റാന്‍ നിര്‍ത്തിയ കാളയെ മാറ്റിക്കെട്ടുന്നതിനിടയിലാണ് റെജിക്ക് കുത്തേറ്റത്. റെജിയുടെ നിലവിളികേട്ട് ഓടിയെത്തിയ ഭാര്യ ഡാര്‍ളിയെയും കാള കുത്തി. ഡാര്‍ളിയെ രക്ഷിക്കാന്‍ ശ്രമിക്കുന്നതിനിടയില്‍ കാള റെജിയെ മരത്തില്‍ ചേര്‍ത്ത് വീണ്ടും കുത്തുകയായിരുന്നു.
നെഞ്ചിലും വയറിലും ഗുരുതരമായി പരുക്കേറ്റ റെജിയെ പൊന്‍കുന്നത്തെ സ്വകാര്യ ആശുപത്രിയിലെത്തിച്ചെങ്കിലും മരിച്ചു. വര്‍ഷങ്ങളായി കാലികളെ വളര്‍ത്തി ജീവിക്കുന്നവരാണ് ഇരുവരും. മകള്‍: ജാസ്മിന്‍ (യുകെ), മരുമകന്‍: സിജോ. സംസ്‌ക്കാരം പിന്നീട്.
