കോട്ടയം : കിടങ്ങൂർ മണർകാട് റോഡിൽ ഓമ്നി വാനിനു തീപിടിച്ചു കത്തി നശിച്ചു. ഇന്ന് രാവിലെ ഏഴരയോടെയാണ് വാനിനു തീപിടിച്ചത്. കെ എൽ എക്സ് 6922 എന്ന ഓമ്നി വാനാണ് കത്തി നശിച്ചത്. തയ്യിൽ കൃഷ്ണ കുമാറിന്റേതാണ് വാഹനം. രാവിലെ പെട്രോൾ അടിയ്ക്കാനായി കൃഷ്ണകുമാർ പോകുമ്പോൾ വാഹനം തനിയെ ഓഫ് ആയി. സൈഡ് ചേർത്ത് നിർത്തിയപ്പോൾ വാഹനത്തിൽ നിന്നും പുക ഉയരുന്നതായി ശ്രദ്ധയിൽപെട്ടു. അടുത്തുള്ള കടക്കാർ വാനിന്റെ അടിയിൽ നിന്നും തീപ്പൊരി കണ്ടതിനെ തുടർന്ന് വെള്ളം ഒഴിച്ച് കെടുത്തുവാൻ ശ്രമിച്ചെങ്കിലും തീ ഉയരുകയായിരുന്നു. തൊട്ടടുത്തുള്ള വീട്ടിൽ നിന്നും വെള്ളം എടുത്ത് കെടുത്തുവാൻ ശ്രമിച്ചെങ്കിലും ഫലപ്രദമായില്ല. പിന്നീട് ഫയർ ഫോഴ്‌സിനെ നാട്ടുകാർ അറിയിച്ചതിനെ തുടർന്ന് ഫയർ ഫോഴ്സ് എത്തി തീ പൂർണ്ണമായും കെടുത്തി. വലിയൊരു അപകടത്തിൽ നിന്നും രക്ഷപെട്ട ആശ്വാസത്തിലാണ്‌ കൃഷ്ണകുമാർ ഇപ്പോൾ.
