മാഞ്ചെസ്റ്റർ : ഇംഗ്ലീഷ് പ്രീമിയർ ലീഗിൽ കരുത്തരായ മാഞ്ചെസ്റ്റർ യുണൈറ്റഡിന് സമനില. ന്യൂ കാസിൽ യുണൈറ്റഡാണ് മാഞ്ചെസ്റ്റർ യുണൈറ്റഡിനെ സമനിലയിൽ കുരുക്കിയത്. ഇരുടീമുകളും ഓരോ ഗോൾ വീതം നേടി. ന്യൂ കാസിലിനായി അലൻ സെയ്ന്റ് മാക്സിമിനും യുണൈറ്റഡിനായി എഡിൻസൺ കവാനിയും ഗോളടിച്ചു. ഭാഗ്യം കൊണ്ടുമാത്രമാണ് യുണൈറ്റഡ് മത്സരത്തിൽ തോൽക്കാതെ രക്ഷപ്പെട്ടത്. ഗോൾ കീപ്പർ ഡേവിഡ് ഡി ഹിയയുടെ മിന്നൽ സേവുകൾ യുണൈറ്റഡിന് തുണയായി. മത്സരത്തിലുടനീളം ആധിപത്യം സ്ഥാപിച്ചെങ്കിലും അർഹിച്ച വിജയം നേടാൻ ന്യൂകാസിലിന് സാധിച്ചില്ല. യുണൈറ്റഡിനെ ഞെട്ടിച്ചുകൊണ്ട് എട്ടാം മിനിട്ടിൽ തന്നെ മാക്സിമിൻ ലക്ഷ്യം കണ്ടു. യുണൈറ്റഡ് പ്രതിരോധ താരങ്ങളെ കബിളിപ്പിച്ചുകൊണ്ട് അതിമനോഹരമായി മാക്സിമിൻ പന്ത് വലയിലെത്തിച്ചു.
റൊണാൾഡോയും ബ്രൂണോ ഫെർണാണ്ടസും സാഞ്ചോയുമെല്ലാം അണിനിരന്നിട്ടും യുണൈറ്റഡിന്റെ ആക്രമണങ്ങൾ ദുർബലമായിരുന്നു. രണ്ടാം പകുതിയിലാണ് യുണൈറ്റഡ് ഒരു ഗോൾ തിരിച്ചടിച്ചത്. 71-ാം മിനിട്ടിൽ കവാനി ടീമിനായി വലകുലുക്കി. ആദ്യ ശ്രമം പരാജയപ്പെട്ടെങ്കിലും രണ്ടാം ശ്രമത്തിൽ കവാനി വലകുലുക്കി. ഗോളെന്നുറച്ച നാലോളം ഷോട്ടുകൾ രക്ഷപ്പെടുത്തിയ ഡി ഗിയയാണ് യുണൈറ്റഡിന്റെ ഹീറോ. ഈ സമനിലയോടെ യുണൈറ്റഡ് പോയന്റ് പട്ടികയിൽ ഏഴാം സ്ഥാനത്ത് തുടരുന്നു. ന്യൂ കാസിൽ 19-ാം സ്ഥാനത്താണ്. മാഞ്ചെസ്റ്റർ സിറ്റിയാണ് പട്ടികയിൽ ഒന്നാമത്.
