ഗുവാഹാട്ടി : മോഷ്ടിക്കാൻ കയറിയ വീട്ടിൽ കിച്ച്ഡിയുണ്ടാക്കിയ കള്ളൻ പോലീസിന്റെ പിടിയിലായി. അസമിലെ ഗുവാഹാട്ടിയിലാണ് കവർച്ചയ്ക്കിടെ കിച്ച്ഡിയുണ്ടാക്കാൻ ശ്രമിച്ചതോടെ മോഷ്ടാവിന് പിടിവീണത്. കഴിഞ്ഞദിവസം ഗുവാഹാട്ടി ഹെങ്കരാബാരിയിലായിരുന്നു സംഭവം. ആളില്ലാത്ത വീട് നോക്കിയാണ് കള്ളൻ മോഷ്ടിക്കാൻ കയറിയത്. കവർച്ചയ്ക്കിടെ വിശന്നതോടെ അടുക്കളയിൽ കയറി കിച്ച്ഡിയുണ്ടാക്കുകയായിരുന്നു. ഇതിനിടെ വീട്ടിലെ അടുക്കളയിൽനിന്ന് സമീപവാസികൾ ശബ്ദം കേട്ടു. വീട്ടുകാർ സ്ഥലത്തില്ലെന്ന് അറിയാവുന്ന അയൽക്കാർ ഇതോടെ ഓടിവരികയും മോഷ്ടാവിനെ കൈയോടെ പിടികൂടി പോലീസിൽ ഏൽപ്പിക്കുകയുമായിരുന്നു.
സംഭവത്തെക്കുറിച്ച് അസം പോലീസ് രസകരമായ ഒരു ട്വീറ്റും പങ്കുവെച്ചിട്ടുണ്ട്. നിരവധി ആരോഗ്യഗുണങ്ങളുണ്ടെങ്കിലും മോഷണത്തിനിടെ കിച്ച്ഡിയുണ്ടാക്കാനുള്ള ശ്രമം ഹാനികരമാകുമെന്നാണ് അസം പോലീസ് ട്വിറ്ററിൽ കുറിച്ചത്. മോഷ്ടാവിനെ പോലീസ് അറസ്റ്റ് ചെയ്തെന്നും ഗുവാഹാട്ടി പോലീസ് അയാൾക്ക് ചൂടുള്ള ഭക്ഷണം വിളമ്പിനൽകുകയാണെന്നും ട്വീറ്റിലുണ്ടായിരുന്നു. ഒട്ടേറെപേർ അസം പോലീസിന്റെ ട്വീറ്റ് റീട്വീറ്റ് ചെയ്തിട്ടുമുണ്ട്.
