തിരുവനന്തപുരം> പ്രതിപക്ഷ നേതാവ് വി ഡി സതീശൻ വെറും ‘ഡയലോഗ് സതീശൻ’ ആയി മാറിയെന്ന് മന്ത്രി പി എ മുഹമ്മദ് റിയാസ്. മുഖ്യമന്ത്രിയെയും മന്ത്രിമാരെയും അധിക്ഷേപിക്കലും തെറിവിളിക്കലുമാണ്‌ പ്രധാന ജോലി. രണ്ടര വർഷമായി അത്‌ തുടരുന്നു. ജനാധിപത്യപരമായ മര്യാദകൾ പോലും പാലിക്കുന്നില്ല. ആ അഭിപ്രായം കോൺഗ്രസിനുള്ളിലും ശക്തമാണ്‌.
ആണി അടിച്ച പട്ടിക ഉൾപ്പെടെ മാരകായുധങ്ങളുമായി സെക്രട്ടറിയേറ്റിന്റെ മുമ്പിൽ സമരം നടത്തുന്നു. പൊലീസ് അറസ്റ്റ് ചെയ്യുന്ന ക്രിമിനലുകളെയും ക്വട്ടേഷൻ സംഘങ്ങളെയും വാഹനത്തിൽനിന്നിറക്കി പ്രതിപക്ഷ നേതാവ് ഔദ്യോഗിക വാഹനത്തിൽ കൊണ്ടുപോകുന്നു. കലാപത്തിന് ആഹ്വാനം ചെയ്യുന്നു. പാർട്ടിയിൽ ഒറ്റപ്പെടുന്നതിന്റെ ഫലമായി നടത്തുന്ന ഇത്തരം ബോധപൂർവമായ നീക്കങ്ങളിലൂടെ സ്വന്തം പക്വത കുറവ്‌ വിളിച്ചുപറയുകയാണ്‌.
ചാൻസലർ വിഷയത്തിൽ പ്രതിപക്ഷ നേതാവിന്റെ പ്രസ്താവന മതനിരപേക്ഷ കേരളം ആകെ എതിർക്കുകയാണ്‌. വ്യാജ ഐഡി കാർഡ് വിഷയവും അങ്കലാപ്പിലാക്കി. അതെല്ലാം മറച്ചുവയ്ക്കാമെന്ന തെറ്റിദ്ധാരണയാണ്‌ സതീശന്‌. ഇങ്ങനെയൊരു പ്രതിപക്ഷ നേതാവ് കേരളത്തിലുണ്ടായിട്ടില്ലെന്നും ആറ്റിങ്ങലിൽ മന്ത്രി പറഞ്ഞു.
