കൊച്ചി : വൈദ്യുതിമന്ത്രി കെ.കൃഷ്ണന്‍കുട്ടിയെ വിമര്‍ശിച്ച് മുന്‍മന്ത്രി എം.എം.മണി. വകുപ്പിലെ കാര്യങ്ങള്‍ മനസ്സിലാക്കുന്നതില്‍ മന്ത്രിക്ക് വീഴ്ചപറ്റി. പ്രഗല്‍ഭര്‍ ഭരിച്ച വകുപ്പാണെന്ന് മന്ത്രി മനസ്സിലാക്കണം. അവരെടുത്ത നിലപാടിന്റെ ഭാഗമാണ് അന്നൊന്നും പ്രശ്നങ്ങൾ ഇല്ലാതെ പോയത്. കെഎസ്ഇബി ചെയര്‍മാനെ നിയന്തിക്കാന്‍ മന്ത്രിക്ക് കഴിയണമെന്നും മണി അഭിപ്രായപ്പെട്ടു.
കെഎസ്ഇബി ചെയർമാൻ ഫെയ്സ്ബുക്കിൽ പോസ്റ്റിട്ടു. കാണേണ്ടവരൊക്കെ കണ്ടശേഷമാണ് അത് പിൻവലിച്ചത്. അയാൾ മര്യാദകേട് കാണിച്ചതാണ്. അദ്ദേഹത്തിന്റെ പെരുമാറ്റം ഏകഛത്രാധിപതിയെപ്പോലെയാണെന്നും മണി തുറന്നടിച്ചു. വൈദ്യുതി ബോർഡ് ചെയർമാന്റെ ഫെയ്സ്ബുക്ക് പോസ്റ്റിൽ മുൻസർക്കാരിന്റെ കരാറുകളെക്കുറിച്ച് ആരോപണം ഉന്നയിച്ചിരുന്നു. അത് പ്രതിപക്ഷം ആയുധമാക്കി. എന്നാൽ അത് ആയുധമാക്കാനുള്ള യോഗ്യത പ്രതിപക്ഷത്തിനില്ലെന്ന് മണി പറഞ്ഞു. വൈദ്യുതി ബോർഡിനകത്ത് ഏറ്റവും വൃത്തികേട് ചെയ്ത ആളുകളാണ് അവരെന്നും മണി ആരോപിച്ചു.
