മുതലമട : പറമ്പിക്കുളം കടുവാസങ്കേതത്തിൽ കടുവയുടെയും പുലികളുടെയും ഇരജീവികളുടെ കണക്കെടുപ്പ് ആരംഭിച്ചു. എയ്റ്റ് ഡേ പ്രോട്ടോക്കോൾ എന്ന പേരിൽ വെള്ളിയാഴ്ചമുതൽ അടുത്ത വെള്ളിയാഴ്ചവരെ നീണ്ടുനിൽക്കുന്നതാണ് കണക്കെടുപ്പ്. കടുവയുടെയും പുലിയുടെയും ഇരകളായ കാട്ടുപോത്ത് (കാട്ടെരുമ), മ്ലാവ്, കേഴമാൻ, കൂരമാൻ, മുയൽ, കരിങ്കുരങ്ങ്, സിംഹവാലൻ കുരങ്ങ് തുടങ്ങിയ മൃഗങ്ങളുടെ കണക്കെടുപ്പാണ് എട്ടുദിവസത്തെ പ്രവർത്തനത്തിൽ പ്രധാനം. കടുവാസങ്കേതത്തെ 20 ഭാഗങ്ങളായി തിരിച്ച് ഒരോഭാഗത്തിനും അഞ്ചുവീതം ഉദ്യോഗസ്ഥരെ പങ്കെടുപ്പിച്ചാണ് കണക്കെടുപ്പ്. എം. സ്ട്രൈപ്സ് എന്ന മൊബൈൽ ആപ്ലിക്കേഷൻ (ആപ്പ് ) ഉപയോഗിച്ചാണ് ഇത്തവണത്തെ പ്രവർത്തനം. ആദ്യമായാണ് മൃഗങ്ങളുടെ കണക്കെടുപ്പിന് മൊബൈൽ ആപ്പ് ഉപയോഗിക്കുന്നതെന്ന് ബയോളജിസ്റ്റ് വിഷ്ണു വിജയൻ പറഞ്ഞു.
മാംസഭോജികളായ ജീവികളുടെ ഇരകൾ വസിക്കുന്ന സ്ഥലം കണ്ടെത്തുക, ഇരകൾക്കാവശ്യമായ സസ്യലതാദികളുടെ സാന്നിധ്യം ഉറപ്പാക്കുക എന്നിവയും കണക്കെടുപ്പിലുണ്ട്. ആദ്യത്തെ മൂന്നുദിവസം പഗ് മാർക്ക് (കാൽപ്പാട്), മരങ്ങളിലെ അടയാളങ്ങൾ, ശബ്ദങ്ങൾ, കാഷ്ഠങ്ങൾ എന്നിവനോക്കി ഓരോ മൃഗത്തിന്റെയും സാന്നിധ്യം ഉറപ്പാക്കും. അടുത്ത രണ്ടുദിവസം രണ്ടുകിലോമീറ്റർ നേർരേഖയിൽ വഴിയുണ്ടാക്കി (ട്രാൻസിറ്റ് സ്ട്രെയ്റ്റ് ലൈൻ) മൃഗസാന്നിധ്യം ഉറപ്പാക്കും. അവസാനത്തെ മൂന്നുദിവസമാണ് ഇര ജീവികളുടെ കൃത്യമായ കണക്ക് രേഖപ്പെടുത്തുന്നത്.
ക്യാമറക്കെണി ഉപയോഗിച്ച് പറമ്പിക്കുളത്ത് അവസാനമായി നടത്തിയ കണക്കെടുപ്പിൽ 35 കടുവകളും 86 പുലികളുമുണ്ടെന്നാണ് തെളിഞ്ഞത്. ഇരമൃഗങ്ങളുടെ കണക്കെടുപ്പിൽ പങ്കെടുക്കുന്നവർക്കായി കഴിഞ്ഞദിവസങ്ങളിൽ നടത്തിയ ക്ലാസുകൾ പറമ്പിക്കുളം കടുവാസങ്കേതം ഡെപ്യൂട്ടി ഡയറക്ടർ എസ്. വൈശാഖ്, ടൈഗർ മോണിറ്ററിങ് എക്സ്പെർട്ട് ഡോ. ബാലസുബ്രഹ്മണ്യം, ബയോളജിസ്റ്റ് വിഷ്ണുവിജയൻ എന്നിവർ നയിച്ചു. കണക്കെടുപ്പിൽ ലഭ്യമാകുന്ന വിവരങ്ങൾ പറമ്പിക്കുളം ടൈഗർഫൗണ്ടേഷന് സമർപ്പിക്കും.
