കോഴിക്കോട്: മുക്കം പൊലീസ് സ്റ്റേഷനിൽ നിന്ന് ജെ.സി.ബി കടത്തിയ സംഭവവുമായി ബന്ധപ്പെട്ട കേസിലെ പ്രതിയായ എസ്.ഐ അറസ്റ്റിൽ. മാവൂർ കുറ്റിക്കടവ് സ്വദേശി നൗഷാദ് ആണ് അറസ്റ്റിലായത്. സിറ്റി റൂറൽ ക്രൈം ഡിറ്റാച്ച്മെന്റ് ഡി.വൈ.എസ്.പി പി. പ്രമോദിന്റെ നേതൃത്വത്തിലുള്ള സംഘമാണ് നൗഷാദിനെ അറസ്റ്റ് ചെയ്തത്. പിന്നീട് ഇയാളെ കോടതി ഉത്തരവനുസരിച്ച് ജാമ്യത്തിൽ വിട്ടയച്ചു.
കേസിലെ പ്രതികളായ ആറു പേര് മുക്കം സ്റ്റേഷനില് കീഴടങ്ങിയപ്പോള് പ്രധാന പ്രതി ബഷീര് ഒളിവില് പോവുകയും പിന്നീട് ഇയാള്ക്ക് മുന്കൂര് ജാമ്യം ലഭിക്കുകയും ചെയ്തു. സെപ്റ്റംബര് 19 ന് കൊടിയത്തൂര് പുതിയനിടത്ത് അപകടത്തില് ഒരാളുടെ മരണത്തിനിടയാക്കിയ ജെ.സി.ബിയാണ് ഉടമയുടെ മകനും സംഘവും ചേര്ന്ന് കടത്തിക്കൊണ്ട് പോയത്.
അപകടം നടക്കുമ്പോള് ജെ.സി.ബിക്ക് ഇന്ഷുറന്സ് ഉണ്ടായിരുന്നില്ല. ജെ.സി.ബി ഉടമയുടെ മകനും കൂമ്പാറ സ്വദേശിയുമായ മാര്ട്ടിന് മാതാളിക്കുന്നേല് (32), കെ.ആര്. ജയേഷ് കീഴ്പ്പള്ളി (32), പൊന്നാങ്കയം സ്വദേശി ദിലീപ് കുമാര് (49), തമിഴ്നാട് സ്വദേശി വേളാങ്കണ്ണി രാജ (55), കല്ലുരുട്ടി സ്വദേശി തറമുട്ടത്ത് രജീഷ് മാത്യു (39), മോഹന്രാജ് (40) എന്നിവര് കീഴടങ്ങുകയും അവരെ അറസ്റ്റ് ചെയ്യുകയുമായിരുന്നു.
