തിരുവനന്തപുരം : മുല്ലപെരിയാറിലെ ബേബി ഡാമിനോട് ചേര്ന്നുള്ള 15 മരങ്ങള് മുറിക്കാന് ഉത്തരവിറക്കിയത് വനം-വന്യ ജീവി പ്രിന്സിപ്പല് സെക്രട്ടറിയുമായും ജലവിഭവ അഡീഷണല് ചീഫ് സെക്രട്ടറിയുമായും കൂടിയാലോചിച്ചാണെന്ന് ചീഫ് വൈല്ഡ് ലൈഫ് വാര്ഡന് ബെന്നിച്ചന് തോമസ്. തനിക്കു നല്കിയ കാരണം കാണിക്കല് നോട്ടിസിനു മറുപടിയായാണ് ബെന്നിച്ചന് ഇക്കാര്യം സര്ക്കാരിനെ അറിയിച്ചത്. മരംമുറിക്കാന് അനുമതി നല്കിയതിനെ തുടര്ന്ന് സസ്പെന്ഷനിലായ ബെന്നിച്ചന്, സര്വീസില് തിരിച്ചെടുത്തശേഷമാണ് സര്ക്കാരിനു മറുപടി നല്കിയത്. മരം മുറി ഉത്തരവിറക്കിയ ശേഷം ഇ മെയിലൂടെയും പ്രത്യേക ദൂതന് വഴിയും ബന്ധപ്പെട്ടവരെ അറിയിച്ചിരുന്നതായും വേണ്ട കൂടിയാലോചന നടത്തിയിരുന്നതായും ബെന്നിച്ചന് വിശദീകരിക്കുന്നു. ഉത്തരവിറക്കിയത് കേരള- തമിഴ്നാട് സെക്രട്ടറിമാരുടെ യോഗത്തിലെ ധാരണ പ്രകാരമായിരുന്നു.
ഉത്തരവിന്റെ പേരില് മാത്രം മരം മുറിക്കാന് കഴിയുമായിരുന്നില്ല. കേന്ദ്ര വനം പരിസ്ഥിതി മന്ത്രാലയത്തിന്റെ അനുമതി ആവശ്യമായിരുന്നെന്നും ബെന്നിച്ചന് പറയുന്നു. വിശദീകരണവും അനുബന്ധ രേഖകളുമടക്കം 34 പേജ് മറുപടിയാണ് കഴിഞ്ഞ മാസം 21ന് ബെന്നിച്ചന് നല്കിയത്. മരം മുറി ഉത്തരവ് സര്ക്കാര് അറിയാതെയാണെന്ന് വനംമന്ത്രി നിലപാടെടുത്തതോടെയാണ് വിവാദങ്ങള് ആരംഭിച്ചത്. നവംബര് പത്തിനു ബെന്നിച്ചന് തോമസിനെ സസ്പെന്ഡ് ചെയ്യാനും മരംമുറി ഉത്തരവ് റദ്ദാക്കാനും മന്ത്രിസഭ തീരുമാനിച്ചു. ഉദ്യോഗസ്ഥ ഇടപെടല് അന്വേഷിക്കാന് ചീഫ് സെക്രട്ടറിയെയും ചുമതലപ്പെടുത്തി. ഡിസംബര് 7ന് ചീഫ് സെക്രട്ടറി കാരണം കാണിക്കല് നോട്ടിസ് നല്കി. ചീഫ് സെക്രട്ടറിയുടെ അനുകൂല റിപ്പോര്ട്ടിനെ തുടര്ന്ന് ഡിസംബര് 9 ന് സസ്പെന്ഷന് പിന്വലിച്ചു. ഡിസംബര് 21ന് കാരണം കാണിക്കല് നോട്ടിസിനു ബെന്നിച്ചന് മറുപടി നല്കി. വിവാദങ്ങളെ തുടര്ന്ന്, മുല്ലപെരിയാര് വിഷയത്തില് കേരള-തമിഴ്നാട് മുഖ്യമന്ത്രിമാര് നടത്താനിരുന്ന ചര്ച്ചയില് തീരുമാനമായിട്ടില്ല.
