കോഴിക്കോട് ∙ പിഎസ്‌സി ജൂൺ 23ന് നടത്താൻ നിശ്ചയിച്ച ഹയർസെക്കൻഡറി അറബിക് അധ്യാപക പരീക്ഷയുടെ സമയം മാറ്റണമെന്ന് മുസ്‌ലിം യൂത്ത് ലീഗ്. വെള്ളിയാഴ്ച രാവിലെ 11.15 മുതൽ ഉച്ചയ്ക്ക് 1.45 വരെയാണ് പരീക്ഷ നടത്താൻ പിഎസ്‌സി നിശ്ചയിച്ചിരിക്കുന്നത്.
സമയം മാറ്റണമെന്ന് ആവശ്യപ്പെട്ട് യൂത്ത് ലീഗ് സംസ്ഥാന ജനറല്‍ സെക്രട്ടറി പി.കെ.ഫിറോസ് മുഖ്യമന്ത്രിക്കും പിഎസ്‌സി ചെയർമാനും കത്തയച്ചു. വെള്ളിയാഴ്ച മുസ്‌ലിം വിശ്വാസികള്‍ നടത്തുന്ന ജുമുഅ നമസ്‌കാരം, പരീക്ഷയില്‍ പങ്കെടുക്കുന്ന ഉദ്യോഗാര്‍ഥികള്‍ക്ക് നഷ്ടപ്പെടുന്ന സാഹചര്യമാണെന്നും സമയം മാറ്റി നിശ്ചയിച്ച് ഉത്തരവിറക്കണമെന്നും ഫിറോസ് ആവശ്യപ്പെട്ടു.
