തിരുവനന്തപുരം: കെ.പി.സി.സി പ്രസിഡന്റ് കെ.സുധാകരനെതിരെ ഗുരുതര ആരോപണവുമായി സി.പി.എം സംസ്ഥാന സെക്രട്ടറി എം.വി ഗോവിന്ദൻ. മോൻസൺ മാവുങ്കൽ ഉൾപ്പെട്ട പോക്സോ കേസുമായി ബന്ധപ്പെട്ടാണ് സുധാകരനെ ചോദ്യം ചെയ്യുന്നതെന്ന് എം.വി ഗോവിന്ദൻ ആരോപിച്ചു. മോൻസൺ പീഡിപ്പിക്കുമ്പോൾ സുധാകരൻ അവിടെയുണ്ടായിരുന്നെന്നാണ് അതിജീവിതയുടെ മൊഴിയെന്നും അദ്ദേഹം പറഞ്ഞു. ദേശാഭിമാനി പത്രത്തിൽ വന്ന വാർത്തയുടെ അടിസ്ഥാനത്തിലായിരുന്നു എം.വി ഗോവിന്ദന്റെ ആരോപണം.
ഇക്കാര്യം അറിഞ്ഞിട്ടും സുധാകരൻ ഇടപ്പെട്ടില്ലെന്നാണ് വാർത്ത. ക്രൈംബ്രാഞ്ച് പറഞ്ഞതും വാർത്തയിലുള്ളതുമാണ് താൻ ഇപ്പോൾ പറയുന്നതെന്നും അദ്ദേഹം കൂട്ടിച്ചേർത്തു. ഒരാൾക്കെതിരെയും പ്രത്യേകമായി കേസെടുക്കണമെന്ന് സി.പി.എമ്മിന് താൽപര്യമില്ല.കേരളത്തിലെ ഭൂരിപക്ഷം മാധ്യമങ്ങളും കമ്യൂണിസ്റ്റ് വിരുദ്ധരാണ്. ലോകത്ത് ഒരിടത്തും ഇത്രയും കമ്മ്യൂണിസ്റ്റ് വിരുദ്ധരായ മാധ്യമങ്ങൾ ഇല്ലെന്നും എം.വി ഗോവിന്ദൻ പറഞ്ഞു.
