കൊച്ചി: കൊച്ചിയില്‍ മദ്യലഹരിയിൽ കുട്ടികൾക്ക് നേരെ അയൽവാസിയുടെ പരാക്രമം. വീടിന് സമീപം കളിച്ചുകൊണ്ടിരുന്ന കുട്ടികളുടെ സൈക്കിളെടുത്ത് അവരുടെ ദേഹത്തേക്ക് വലിച്ചെറിഞ്ഞതിനെ തുടർന്ന് 14കാരന്റെ കാൽവിരൽ അറ്റുതൂങ്ങി. ഫോർട്ട്കൊച്ചി ബീച്ച് റോഡിൽ സുബിൻ സാമുവലിന്റെ മകൻ മിലൻ സാമുവലിനാണ് (14) ഗുരുതര പരിക്കേറ്റത്.
വിദ്യാർഥിയെ എറണാകുളത്തെ സ്വകാര്യ ആശുപത്രിയിൽ ശസ്ത്രക്രിയക്ക് വിധേയനാക്കി. വീടിന് സമീപം വഴിയരികിൽ കളിച്ചുകൊണ്ട് നിൽക്കുകയായിരുന്നു മിലനും മൂന്ന് സുഹൃത്തുക്കളും. ഈ സമയം ഇതുവഴി വന്ന അയൽവാസി ദാസ് കുട്ടികളോട് കയർക്കുകയും അവിടെയുണ്ടായിരുന്ന കുട്ടികളുടെ സൈക്കിളിൽ ചവിട്ടുകയും പിന്നീട് മിലന്റെ ദേഹത്തേക്ക് സൈക്കിളെടുത്ത് എറിയുകയുമായിരുന്നെന്ന് ദൃക്സാക്ഷികൾ പറയുന്നു.
