തിരുവനന്തപുരം > കെല്ട്രോണിന് ഒഡീഷയില് നിന്നും 164 കോടി രൂപയുടെ ഓര്ഡര് ലഭിച്ചതായി മന്ത്രി പി രാജീവ്. ഒഡീഷ കമ്പ്യൂട്ടര് ആപ്ലിക്കേഷന് സെന്ററില് നിന്ന് 6974 സര്ക്കാര് എയ്ഡഡ് സ്കൂളുകളിലേക്ക് ഹൈടെക് ക്ലാസ് റൂമുകള് സ്ഥാപിക്കുന്നതിനുള്ള ഓര്ഡറാണ് ലഭിച്ചത്. സ്മാര്ട്ട് ക്ലാസ് റൂം പദ്ധതി ഇന്ത്യയിലാകെ തന്നെ വിദ്യാഭ്യാസ രംഗത്തെ കേരള മോഡലായി പ്രശംസ നേടിയിരുന്നുവെന്നും ഇതിന് പിന്നാലെയാണ് ഒഡീഷയിലും കേരള മോഡല് സ്മാര്ട്ട് ക്ലാസ് റൂമുകള് നിര്മ്മിക്കുന്നതിനുള്ള കരാര് കെല്ട്രോണിന് ലഭിച്ചതെന്നും മന്ത്രി പറഞ്ഞു.
പി രാജീവിന്റെ ഫെയ്സ്ബുക്ക് കുറിപ്പ്:
കെൽട്രോണിന് ഒഡീഷയിൽ നിന്നും 164 കോടി രൂപയുടെ ഓർഡർ ലഭിച്ചിരിക്കുന്നത് അൻപതാം വാർഷികമാഘോഷിക്കുന്ന കമ്പനിയുടെ പുത്തനുണർവ്വിനുള്ള അംഗീകാരമാണ്. ഒഡീഷയിലുള്ള ഒറീസ കമ്പ്യൂട്ടർ ആപ്ലിക്കേഷൻ സെൻററിൽ (OCAC) നിന്നും 6974 സർക്കാർ, സർക്കാർ എയ്ഡഡ് സ്കൂളുകളിലേക്ക് ഹൈടെക് ക്ലാസ് റൂമുകൾ സ്ഥാപിക്കുന്നതിനുള്ള ഓർഡറാണ് കെൽട്രോണിന് ലഭിച്ചിരിക്കുന്നത്.
164 കോടി രൂപയുടെ ഈ ഓർഡറിന്റെ അടിസ്ഥാനത്തിൽ സ്മാർട്ട് ക്ലാസ് റൂമുകൾ സ്ഥാപിക്കുന്നതിനൊപ്പം അവയുടെ കമ്മീഷനിങ്, ഓപ്പറേഷൻ, കണ്ടന്റ് സ്റ്റോറേജും ഡിസ്ട്രിബ്യൂഷൻ സോഫ്റ്റ്വെയർ ഉൾപ്പെടെയുള്ള മൂന്നുവർഷത്തേക്കുള്ള മെയിൻറനൻസ് സേവനങ്ങളും കെൽട്രോൺ നൽകുന്നതാണ്.
2016 മുതൽ സംസ്ഥാനമൊട്ടാകെ വിവിധ സ്കൂളുകളിലായി നാൽപ്പത്തി അയ്യായിരം സ്മാർട്ട് ക്ലാസ് റൂമുകൾ കെൽട്രോൺ സജ്ജീകരിച്ചിട്ടുണ്ട്. സ്മാർട്ട് ക്ലാസ് റൂം പദ്ധതി ഇന്ത്യയിലാകെത്തന്നെ വിദ്യാഭ്യാസ രംഗത്തെ കേരള മോഡലായി പ്രശംസ നേടിയിരുന്നു. ഇതിന്റെ ചുവടുവച്ചാണ് ഒഡീഷയിലും കേരള മോഡൽ സ്മാർട്ട് ക്ലാസ് റൂമുകൾ നിർമ്മിക്കുന്നതിനുള്ള കരാർ കെൽട്രോണിന് ലഭിച്ചിരിക്കുന്നത്.
