പാലക്കാട് : ഒറ്റപ്പാലം പനമണ്ണ ചക്ക്യാവില്‍ വിനോദിനെ (32) കൊലപ്പെടുത്തുകയും സഹോദരന്‍ രാമചന്ദ്രനെ (സ്വത്തു രാമചന്ദ്രന്‍-30) കൊലപ്പെടുത്താന്‍ ശ്രമിക്കുകയും ചെയ്‌തെന്ന കേസില്‍ 4 പേര്‍ക്ക് ജീവപര്യന്തം തടവും ഒരു ലക്ഷം രൂപ വീതം പിഴയും. പനമണ്ണ അമ്പലവട്ടം തറയില്‍ മനാഫ് (38), അരഞ്ഞിക്കല്‍ അബ്ദുല്‍ റഹ്‌മാന്‍ (ബാഷ -40), വരോട് നാലാംമൈല്‍ കൂരിത്തൊടിയില്‍ സനൂപ് (സനു – 32), തൃക്കടീരി കിഴൂര്‍ റോഡ് കണക്കഞ്ചേരി അന്‍സാര്‍ അഹമ്മദ് (36) എന്നിവരെയാണ് ഒറ്റപ്പാലം അഡിഷനല്‍ ജില്ലാ സെഷന്‍സ് ജഡ്ജി പി.സെയ്തലവി ശിക്ഷിച്ചത്. 2020 മേയ് 31നു രാത്രി 10 നാണ് സഹോദരങ്ങള്‍ക്ക് നേരെ ആക്രമണമുണ്ടായത്. ഇരുവിഭാഗങ്ങള്‍ തമ്മില്‍ നിലനിന്നിരുന്ന തര്‍ക്കം പറഞ്ഞു തീര്‍ക്കാനെന്ന പേരില്‍ വിളിച്ചു വരുത്തി ആക്രമിച്ചെന്നാണു കേസ്.
പരുക്കേറ്റ് ചികിത്സയില്‍ കഴിഞ്ഞിരുന്ന വിനോദ് 22-ാം ദിവസമാണ് മരിച്ചത്. ഒറ്റപ്പാലം സര്‍ക്കിള്‍ ഇന്‍സ്‌പെക്ടറായിരുന്ന എം.സുജിത്, എസ്‌ഐ എസ്.അനീഷ് എന്നിവരുടെ നേതൃത്വത്തിലായിരുന്നു അന്വേഷണം. പ്രോസിക്യൂഷനു വേണ്ടി അഡിഷനല്‍ പബ്ലിക് പ്രോസിക്യൂട്ടര്‍ കെ.ഹരി ഹാജരായി.
