കണ്ണൂർ : മാവേലി എക്സ്പ്രസില് റെയിൽവേ പോലീസ് എഎസ്ഐ എം.സി.പ്രമോദ് ചവിട്ടിവീഴ്ത്തിയ യാത്രക്കാരനെ തിരിച്ചറിഞ്ഞു. കൂത്തുപറമ്പ് സ്വദേശി പൊന്നന് ഷമീറിനാണ് ചവിട്ടേറ്റത്. ക്രിമിനല് കേസുകളില് പ്രതിയാണ് പൊന്നന് ഷമീറെന്ന് പോലീസ് അറിയിച്ചു. ഭവനഭേദനത്തിന് മൂന്നുവര്ഷം ജയില്ശിക്ഷ അനുഭവിച്ചിട്ടുണ്ടെന്നും പോലീസ് പറഞ്ഞു. ഞായറാഴ്ച രാത്രി എട്ടരയോടെ മംഗളൂരു–തിരുവനന്തപുരം മാവേലി എക്സ്പ്രസിന്റെ എസ്2 സ്ലീപ്പർ കോച്ചിൽ, മാഹിക്കും വടകരയ്ക്കും ഇടയിലായിരുന്നു സംഭവം. ടിക്കറ്റില്ലാതെ യാത്ര ചെയ്തു എന്നാരോപിച്ചാണ് എഎസ്ഐ യാത്രക്കാരനെ ബൂട്ടിട്ട കാലു കൊണ്ട് വയറ്റിൽ ചവിട്ടി വീഴ്ത്തിയത്. പലതവണ മുഖത്തടിച്ചതായും ആക്ഷേപമുണ്ട്.
മർദനത്തിനു ശേഷം വടകര സ്റ്റേഷനിൽ ഇയാളെ ഇറക്കിവിടുകയായിരുന്നു. യാത്രക്കാരനെ ചവിട്ടി വീഴ്ത്തുന്നതിന്റെ ദൃശ്യങ്ങൾ ഇതേ കോച്ചിലുണ്ടായിരുന്ന മറ്റൊരു യാത്രക്കാരൻ പകർത്തിയതു പുറത്തുവന്നതോടെ എം.സി.പ്രമോദിനെ സസ്പെൻഡ് ചെയ്തു. കേരള പോലീസിൽനിന്നു ഡപ്യൂട്ടേഷനിൽ റെയിൽവേ പോലീസിലെത്തിയതാണ് പ്രമോദ്.
