പത്തനംതിട്ട∙ ഡിസിസി പുനഃസംഘടനയുമായി ബന്ധപ്പെട്ട് പത്തനംതിട്ടയിൽ പ്രതിഷേധവുമായി എ ഗ്രൂപ്പ്. യോഗം ചേർന്ന മുറിയുടെ കതക് ചവിട്ടുത്തുറക്കാൻ ശ്രമിച്ചു. മുൻ ഡിസിസി പ്രസിഡന്റ് ബാബു ജോർജ് കതകിൽ ചവിട്ടുന്നതിന്റെ ദൃശ്യങ്ങൾ പുറത്തുവന്നു.
ഒരാഴ്ച മുൻപ് നടന്ന സംഭവമാണിത്. പുനഃസംഘടനയിൽ ഉടക്കി എ ഗ്രൂപ്പ് യോഗത്തിൽ നിന്ന് മുൻ ഡിസിസി പ്രസിഡന്റ് ഡി. മോഹൻരാജ്, ബാബു ജോർജ്, മുൻ എംഎൽഎ കെ. ശിവദാസ് നായർ എന്നിവർ ഇറങ്ങിപ്പോയിരുന്നു. സംഘടനാ നടപടിയെടുത്ത് മാറ്റിനിർത്തിയവരെക്കൂടി പുനഃസംഘടനയിൽ ഉൾപ്പെടുത്തണമെന്ന ഇവരുടെ ആവശ്യം നിലവിലെ ഡിസിസി പ്രസിഡന്റായ സതീഷ് കൊച്ചുപറമ്പിൽ, കെപിസിസി ജനറൽ സെക്രട്ടറി പഴകുളം മധു എന്നിവർ തള്ളിക്കളഞ്ഞു. ഇതിനെ തുടർന്ന് യോഗത്തിൽ രൂക്ഷമായി സംസാരിച്ചശേഷം അവിടെനിന്ന് ഇറങ്ങിപ്പോകുകയായിരുന്നു. എന്നാൽ വീണ്ടും തിരിച്ചെത്തി ബാബു ജോർജ് യോഗം നടക്കുന്ന മുറിയുടെ കതക് ചവിട്ടിത്തുറക്കുകയായിരുന്നു.
