തിരുവനന്തപുരം : പി സി ജോര്ജിനെ വേട്ടയാടി മൂലയ്ക്കിരുത്താമെന്ന് വിചാരിക്കേണ്ടെന്ന് ബിജെപി സംസ്ഥാന അധ്യക്ഷന് കെ സുരേന്ദ്രന്. പി സി ജോര്ജിന്റെ പ്രസംഗം വലിയ അപരാധമാണെങ്കില് പി സിയെക്കാള് മ്ളേച്ചമായി സംസാരിച്ചവര്ക്കെതിരെ എന്തുകൊണ്ട് നടപടിയെടുക്കുന്നില്ലെന്ന് ബിജെപി സംസ്ഥാന അധ്യക്ഷന് ചോദിച്ചു. പി സി ജോര്ജിന് ബിജെപി ജനാധിപത്യ സംരക്ഷണം നല്കുമെന്ന് കെ സുരേന്ദ്രന് അറിയിച്ചു. ഹിന്ദുക്കളെ ഭിന്നിപ്പിക്കുമെന്ന് പറഞ്ഞ ഫസല് ഗഫൂറിനെതിരെ എന്ത് നടപടിയാണ് സ്വീകരിക്കുന്നതെന്ന് കെ സുരേന്ദ്രന് ചോദിച്ചു. പോപ്പുലര് ഫ്രണ്ട് ഓഫ് ഇന്ത്യ പാലാ ബിഷപ്പിനെതിരെ തിരിഞ്ഞപ്പോഴും യാതൊരു നടപടിയുമുണ്ടായില്ലെന്നും ബിജെപി പ്രവര്ത്തകര് മാത്രമാണ് അദ്ദേഹത്തെ സംരക്ഷിക്കാനെത്തിയതെന്നും അദ്ദേഹം പറഞ്ഞു.
വെണ്ണല വിദ്വേഷ പ്രസംഗക്കേസില് മുന്കൂര് ജാമ്യം നിഷേധിക്കപ്പെട്ട ശേഷം പി സി ജോര്ജ് എവിടെയും ഒളിച്ചോടിയിട്ടില്ലെന്ന് മകന് ഷോണ് ജോര്ജ് പറഞ്ഞിരുന്നു. പി സി ജോര്ജ് തിരുവനന്തപുരത്ത് തന്നെയുണ്ടെന്ന് ബന്ധുക്കള് പറയുന്നു. പിണറായി വിജയന്റെ നേതൃത്വത്തിലുള്ള എല്ഡിഎഫ് സര്ക്കാരിന്റെ പ്രതികാര നടപടിക്ക് വഴങ്ങില്ലെന്നും നീതിക്കായി ഹൈക്കോടതിയെ സമീപിക്കുമെന്നും ഷോണ് ജോര്ജ് പറഞ്ഞു. പി സി ജോര്ജിനെതിരായ നടപടിയെ തൃക്കാക്കര സ്റ്റണ്ടെന്ന് വിളിച്ച് പരിഹസിക്കുകയാണ് ഷോണ് ജോര്ജ് ചെയ്തത്. തെരഞ്ഞെടുപ്പ് വിജയത്തിനായി ചില പ്രത്യേക മതത്തിലെ തീവ്ര വിഭാഗങ്ങളെ പ്രീണിപ്പിക്കാനാണ് സര്ക്കാര് ശ്രമിക്കുന്നതെന്ന് ഷോണ് ജോര്ജ് ആരോപിച്ചു. ഈ പ്രീണനം സര്ക്കാരിന് തന്നെ വലിയ തിരിച്ചടിയാകും. പി സി ജോര്ജിനെ വര്ഗീയ വാദിയായി ചിത്രീകരിക്കുന്ന ഇവരാണ് വലിയ വര്ഗീയവാദി. വിജയ് ബാബുവിനെപ്പോലെ പി സി ജോര്ജ് ഒളിച്ചോടുമെന്ന് ആരും കരുതില്ലെന്നും ഷോണ് ജോര്ജ് കൂട്ടിച്ചേര്ത്തു.
