ന്യൂഡൽഹി : പെഗസിസ് ഫോണ് ചോര്ത്തലില് സുപ്രീംകോടതി നിയോഗിച്ച സമിതിയുടെ അന്വേഷണം അടുത്ത ഘട്ടത്തിലേക്ക്. ചാര സോഫ്റ്റ്വെയര് ബാധിച്ചുവെന്ന് സംശയിക്കുന്നവര്ക്ക് വിവരങ്ങള് കൈമാറാന് അവസരം നല്കി. ജനുവരി ഏഴിന് ഉച്ചയ്ക്ക് മുന്പ് പൊതുജനങ്ങള്ക്ക് സമിതിയെ സമീപിക്കാം. ഇതുസംബന്ധിച്ച പൊതു നോട്ടീസ്, സാങ്കേതിക വിദഗ്ധ സമിതി പുറത്തിറക്കി. പെഗസിസ് ബാധയുണ്ടെന്ന് സംശയമുള്ളവര് മൊബൈല് ഫോണ് തുടങ്ങിയവ സമിതിക്ക് കൈമാറണം. പരിശോധനക്ക് ശേഷം ഇവ തിരികെ നല്കുമെന്നും സമിതി വ്യക്തമാക്കി. റിട്ടയേഡ് സുപ്രിംകോടതി ജഡ്ജി ആര് വി രവീന്ദ്രന് അധ്യക്ഷനായ മൂന്നംഗ വിദഗ്ധ സമിതിയെയാണ് പെഗസിസ് ഫോണ് ചോര്ത്തല് അന്വേഷിക്കാന് സുപ്രിംകോടതി നിയോഗിച്ചത്.
സൈബര് സെക്യൂരിറ്റി ആന്ഡ് ഡിജിറ്റല് ഫോറന്സികിലെ പ്രൊ.ഡോ നവീന്കുമാര് ചൗധരി(ഗുജറാത്തിലെ ഗാന്ധി നഗര് നാഷണല് ഫോറന്സിക് സയന്സസ് യൂണിവേഴ്സിറ്റിയിലെ ഡീന്), ഡോ.പി പ്രഭാകരന് (പ്രൊഫസര്, അമൃത വിശ്വവിദ്യാപീഠം, അമൃതപുരി, കൊല്ലം), ഡോ.അശ്വിന് അനില് ഗുമസ്തെ (അസോസിയേറ്റ് പ്രൊഫസര്, ഐഐടി മുംബൈ) എന്നിവരടങ്ങിയതാണ് സമിതി. കോടതി പലതവണ ആവശ്യപ്പെട്ടിട്ടും രാജ്യസുരക്ഷ ചൂണ്ടിക്കാട്ടി മറുപടി നല്കാന് കേന്ദ്രസര്ക്കാര് തയ്യാറായിരുന്നില്ല. സമിതി അടിയന്തരമായി പ്രവര്ത്തനം ആരംഭിക്കണം. എട്ടാഴ്ചയ്ക്ക് ശേഷം ഹര്ജികള് വീണ്ടും പരിഗണിക്കും. വിഷയത്തില് കോടതിക്ക് മൂകസാക്ഷിയായിരിക്കാന് കഴിയില്ലെന്നും നിലപാടറിയിക്കാന് കേന്ദ്രസര്ക്കാരിന് ആവശ്യത്തിലധികം സമയം അനുവദിച്ചിരുന്നതാണെന്നും കോടതി വ്യക്തമാക്കി.
അന്വേഷണത്തിന് സ്വന്തം നിലയില് സാങ്കേതിക വിദഗ്ധ സമിതി രൂപീകരിക്കുമെന്ന് ചീഫ് ജസ്റ്റിസ് നേരത്തെ തന്നെ സൂചന നല്കിയിരുന്നു. ചാരസോഫ്റ്റ് വെയര് ഉപയോഗിച്ചോ എന്നതില് കേന്ദ്രസര്ക്കാര് സുപ്രിംകോടതിക്ക് മറുപടി നല്കിയിരുന്നില്ല. പൊതുതാത്പര്യവും രാജ്യസുരക്ഷയും മുന്നിര്ത്തി അധിക സത്യവാങ്മൂലം സമര്പ്പിക്കാന് കഴിയില്ല എന്ന നിലപാടാണ് കേന്ദ്രസര്ക്കാര് സ്വീകരിച്ചത്. ഇസ്രയേല് നിര്മിത ചാര സോഫ്റ്റ്വയര് പെഗാസസ് ഉപയോഗിച്ച് കേന്ദ്രമന്ത്രിമാരുടെയും പ്രതിപക്ഷ നേതാക്കളുടെയും ജഡ്ജിമാരുടെയും മാധ്യമ പ്രവര്ത്തകരുടെയും ഫോണ് ചോര്ത്തിയെന്ന വെളിപ്പെടുത്തല് ദി വയറാണ് ആദ്യം പുറത്തുവിട്ടത്. ഇത് വലിയ വിവാദങ്ങള്ക്ക് വഴി തെളിയ്ക്കുകയും സംഭവത്തില് സുപ്രിംകോടതി ഇടപെടുകയുമായിരുന്നു. കേന്ദ്രസര്ക്കാരിന്റെ അറിവോടെയാണ് ഫോണ് ചോര്ത്തല് നടന്നതെന്ന് ആരോപണമുയര്ന്നിരുന്നെങ്കിലും കേന്ദ്രം ഇത് നിഷേധിച്ചു.
