തിരുവനന്തപുരം : യോഗിയ്ക്കും ബിജെപി സർക്കാരുകൾക്കും എതിരെ നടത്തുന്ന നുണ പ്രചാരണങ്ങൾ കേരള മുഖ്യമന്ത്രി പിണറായി വിജയനും സിപിഐഎമ്മും നിർത്തണമെന്ന് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ. പിണറായി യുപി മുഖ്യമന്ത്രി യോഗി ആദിത്യനാഥിനെതിരെ നടത്തിയ വിഷലിപ്തമായ പ്രചരണത്തിനുള്ള തിരിച്ചടി കൂടിയാണ് യുപിയിലെ ബിജെപിയുടെ ചരിത്ര വിജയം.
കേരള മോഡൽ യുപിക്കാർ മാതൃകയാക്കണമെന്ന പിണറായിയുടെ ആവശ്യം ഉത്തരപ്രദേശുകാർ ചവറ്റുകൊട്ടയിലെറിഞ്ഞു. യുപി മാതൃകയാണ് കേരളത്തിനും അഭികാമ്യമെന്നും ബിജെപി അദ്ധ്യക്ഷൻ പറഞ്ഞു. കോൺഗ്രസിൻ്റ അഞ്ച് സംസ്ഥാനത്തെയും ദയനീയ തോൽവി കേരളത്തിലും അവരുടെ പതനത്തിൻ്റെ ആക്കം കൂട്ടും. കോൺഗ്രസ് രാജ്യത്ത് നിന്നും നിഷ്ക്കാസനം ചെയ്യപ്പെടുകയാണ്. രാഹുൽ ഗാന്ധിക്ക് ഇനി വയനാട് പ്രധാനമന്ത്രിയാവാനേ സാധിക്കൂ.
രാജ്യത്തെ തെരഞ്ഞെടുപ്പ് ഫലം പ്രധാനമന്ത്രിയിൽ ജനങ്ങൾക്കുള്ള വിശ്വാസം വർധിക്കുന്നതിൻ്റെ തെളിവാണ്. നരേന്ദ്രമോദി സർക്കാരിന്റെ ജനക്ഷേമ പദ്ധതികൾക്കുള്ള അംഗീകാരമാണ് ഈ ചരിത്ര വിജയമെന്നും സുരേന്ദ്രൻ കൂട്ടിച്ചേർത്തു. മണിപ്പൂരിലും ഗോവയിലും ബിജെപി നേടിയ വിജയം കേരളത്തിലും സ്വാധീനിക്കും. മതന്യൂനപക്ഷ സമുദായങ്ങൾക്ക് സ്വാധീനമുള്ള സംസ്ഥാനങ്ങളിൽ പാർട്ടി നേടിയ വിജയത്തിന്റെ പ്രതിഫലനമുണ്ടാക്കുമെന്നും സുരേന്ദ്രൻ പറഞ്ഞു.
