തിരുവനന്തപുരം: തിരുവനന്തപുരത്ത് വീട്ടില്‍ നിന്നും ബൈക്ക് മോഷ്ടിച്ച കേസില്‍ യുവാവ് പിടിയില്‍. വിളപ്പില്‍ശാല – വിട്ടിയംപാടുള്ള വീട്ടില്‍ നിന്നും ബൈക്ക് മോഷ്ടിച്ച കേസിലാണ് കല്ലിയൂര്‍ കല്ലുവിള വീട്ടില്‍ വാടകയ്ക്ക് താമസിക്കുന്ന ശ്രീക്കാന്ത് എന്ന് വിളിക്കുന്ന അരുണ്‍ (38) നെ വിളപ്പില്‍ശാല പോലീസ് അറസ്റ്റ് ചെയ്തത്. ഇക്കഴിഞ്ഞ 15 ന് വെളുപ്പിന് 1.00 മണിയോടെയാണ് മോഷണം നടന്നത്. വിട്ടിയംപാട് ഹരിശ്രീയില്‍ ഷിജുകുമാറിന്റെ വീടിന്റെ മുന്നിലുള്ള കാര്‍ ഷെഡില്‍ സൂക്ഷിച്ചിരുന്ന ഹീറോ ഹോണ്ട സ്പ്ലണ്ടര്‍ പ്‌ളസ് മോട്ടോര്‍ സൈക്കിളാണ് മോഷണം പോയത്. അന്വേഷണത്തില്‍ അരുണിനെ മോഷ്ടിച്ച ബൈക്ക് സഹിതമാണ് പിടികൂടിയത്. ഇയാള്‍ തിരുവനന്തപുരം ജില്ലയിലെ വിവിധ സ്റ്റേഷനുകളില്‍ നിരവധി കളവു കേസുകളിലെ പ്രതിയാണ്.
