കാൺപൂർ> നടി പൂനം പാണ്ഡെയുടെ രോഗത്തെയും മരണത്തെയും കുറിച്ചുള്ള വാർത്തകൾക്ക് പിന്നാലെ ആശയ കുഴപ്പം. ദേശീയ മാധ്യമങ്ങൾ ഒന്നാകെ മരണത്തെയും രോഗത്തെയും കുറിച്ച് വാർത്തകൾ നൽകി. എന്നാൽ പിന്നീട് നടിയുടെ കുടുംബവുമായി യാതൊരു വിധത്തിലും ബന്ധപ്പെടാൻ കഴിഞ്ഞില്ല. പൊലീസിലോ ബന്ധപ്പെട്ട അധികാരികളിലോ ഇതു സംബന്ധിച്ച് വിവരങ്ങൾ ഇല്ല.
താരത്തിന്റെ ഔദ്യോഗിക ഇൻസ്റ്റഗ്രാം പേജിലൂടെയാണ് മരണ വിവരം പുറത്തുവന്നത്. സെർവിക്കൽ കാൻസർ മൂലം വ്യാഴാഴ്ച രാത്രി അന്ത്യമെന്നാണ് പൂനത്തിന്റെ മാനേജർ ഔദ്യോഗിക പേജിൽ കുറിച്ചത്. ഞങ്ങൾ ഓരോരുത്തർക്കും ഈ പ്രഭാതം വേദനാജനകമാണ്. നമ്മുടെ പ്രിയപ്പെട്ട പൂനം സെർവിക്കൽ കാൻസറിനു കീഴടങ്ങിയെന്ന വിവരം ദുഖത്തോടെ പങ്കുവയ്ക്കുന്നു എന്ന കുറിപ്പോടെയാണ് വിവരം കൈമാറിയത്.
പൂനത്തിന്റെ സഹോദരി മരണ വാർത്ത സ്ഥിരീകരിച്ചതിനാലാണ് വെളിപ്പെടുത്തലെന്ന് മാനേജർ വ്യക്തമാക്കുകയും ചെയ്തു. ഇതോടെയാണ് പൂനത്തിന്റെ സഹോദരിയെ ഫോണിൽ ബന്ധപ്പെടാൻ ശ്രമിച്ചത്. പൂനത്തിന്റെ സഹോദരിയുടെ ഫോൺ സ്വിച്ച് ഓഫാണെന്നും മറ്റ് കുടുംബാംഗങ്ങളെ ആരെയും ബന്ധപ്പെടാൻ സാധിക്കുന്നില്ലെന്നും ഇന്ത്യാ ടുഡേ റിപ്പോർട്ടിൽ പറയുന്നു.
