ദില്ലി : എന്ഐഎ ദില്ലിയില് രജിസ്റ്റർ ചെയ്ത കേസില് അറസ്ററിലായ പോപ്പുലർ ഫ്രണ്ട് നേതാക്കളുടെ കസ്റ്റഡി കാലാവധി ഇന്ന് തീരും. പ്രതികളെ ദില്ലി എന്ഐഎ കോടതിയില് ഹാജരാക്കും. ഭീകരപ്രവർത്തനം കണ്ടെത്തി പോപ്പുലർ ഫ്രണ്ടിനെ ആഭ്യന്തരമന്ത്രാലയം നിരോധിച്ച കാര്യം എന്ഐഎ കോടതിയില് ചൂണ്ടിക്കാട്ടും. നിലവിലെ കേസില് അന്വേഷണം തുടരുന്നതിനാല് പ്രതികളെ കൂടുതല് ചോദ്യം ചെയ്യാന് ഇനിയും കസ്റ്റഡിയില് വേണമെന്നാകും എന്ഐഎ കോടതിയില് ആവശ്യപ്പെടുക. അതേസമയം കേസിലെ റിമാന്ഡ് റിപ്പോർട്ടും എഫ്ഐആർ പകർപ്പും നല്കണമെന്ന് പോപ്പുലർ പ്രതികൾക്ക് വേണ്ടി ഹാജരാകുന്ന അഭിഭാഷകന് ആവശ്യപ്പെടും. കേസിന്റെ ഗൗരവ സ്വഭാവം പരിഗണിച്ചാണ് രേഖകൾ പ്രതികൾക്ക് കോടതി നല്കാത്തത്.
